Երևանի պետական համալսարանի մի քանի տարբեր ֆակուլտետներից մոտ 40 ուսանող մի քանի օր առաջ հանկարծակի իմացել է, որ դուրս է մնացել համալսարանից: Իրավագիտություն, հանրային կառավարում, փիլիսոփայություն, հոգեբանություն և մի քանի այլ ֆակուլտետների ուսանողներ ուսումնական տարվա ավարտին երկրից բացակայելու վերաբերյալ դիմում են գրել իրենց դեկանատներ, իրազեկել, որ կոնկրետ ժամանակով բացակայելու են, խնդրել են հնարավորություն տալ, որ նախապես հանձնեն քննությունները, կամ հնարավորություն տալ վերադառնալուց հետո հանձնել դրանք: Դեկանատը ի գիտություն է ընդունել դիմումները, սակայն օրերս ուսանողները դեկանատներից զանգ են ստացել, որով վերջիններս տեղեկացել են, որ իրենք հեռացված են պետական համալսարանից:
«Կարգն այսպես է՝ առաջինից երրորդ կուրս մեկ առարկայից երկու լիկվիդ ունենալու պատճառով համալսարանից դուրս են մնում: Կոնկրետ ես ու էլի լիքը ուսանողներ դիմում ենք գրել, որ չենք լինելու երկրում, դիմումը ներկայացրել ենք դեկանատ, դեկանը կնքել է դիմումը: Նա տեղյակ է եղել, որ ես երկրում չեմ լինելու և վերադառնալուց հետո եմ հանձնելու քննություններս: Իրենք ասել են, որ ոչ մի խնդիր չի լինի, կվերադառնամ, կմասնակցեմ լուծարքներին ու կստանամ քննություններս: Իսկ ես եկել եմ, ամեն չհանձնած առարկայի համար 10 հազար դրամ վճարել, քաղպաշտպանությունից քննություն եմ հանձնել ու մինչև վաղը էլի կարող էի մասնակցել լիկվիդներին, բայց մեզ թույլ չեն տալիս, ասում են՝ ձեր կրեդիտները չեն բավականացնում, և դուք դուրս եք մնացել համալսարանից: Բայց մեզ ոչ մի ծանուցում չի ուղարկվել, որ հեռացման վտանգ կա: Մեզ զանգել ու ասել են, որ արդեն հեռացված ենք»,- «Առաջին լրատվական»-ի հետ զրույցում ասաց հոգեբանության ֆակուլտետից դուրս մնացած Ա. Հակոբյանը՝ հավելելով, որ այլ ընկերներ էլ ունի, ովքեր նույն պատճառով դուրս են մնացել, նրանց թույլ չեն տվել մասնակցելու լիկվիդացիոն շրջանին:
Ուսանողուհին նշեց, որ խնդրի հետ կապված մոտեցել են իրենց դեկանին, պարզաբանում խնդրել, բայց նա ասել է, որ իր ձեռքում ոչինչ չկա: «Ես չեմ հասկանում, թե ինչու այս խնդիրը առաջացավ: Եթե նման վտանգ կար, թող իրենք նախապես ասեին, տեղյակ պահեին, ոչ թե դիմումս ստորագրեին, կնքեին, ես էլ հանգիստ մեկնեի: Հիմա եկել ու փաստի առաջ եմ կանգնել: Թույլ են տվել մեկ լիկվիդի մասնակցել, որը չեն նշանակել»,- ասաց Ա. Հակոբյանը:
«Առաջին լրատվական»-ը փորձեց պարզաբանում ստանալ նաև ԵՊՀ-ից: Ռեկտոր Արամ Սիմոնյանը ուսանողների պնդումները հերյուրանք որակեց ու հայտարարեց, որ նրանք բոլորն էլ դուրս են մնացել իրենց վատ առաջադիմության պատճառով: «Այդպիսի բան չկա, նրանց ասածները հերյուրանք են: Վատ առաջադիմություն ունեցող ուսանողները ամեն ինչ մտածում են, որ մնան համալսարանում, չսովորեն, բայց մնան համալսարանում»,- ասաց ԵՊՀ ռեկտորը:
Մեր դիտարկմանը, թե այդ դեպքում ինչու են դեկանատները հաստատել նրանց դիմումները և հավաստիացրել, որ ոչ մի խնդիր չի առաջանա քաղաքից բացակայելու դեպքում, Արամ Սիմոնյանը չցանկացավ պատասխանել: Նա պնդեց իր ասածը և անջատեց հեռախոսը՝ ոչ աշխատանքային օրով իրեն զանգահարելու պատճառով:
