«Առաջին լրատվական»-ի զրուցակիցն է «Ժողովրդավարական հայրենիք» կուսակցության նախագահ Պետրոս Մակեյանը։
– Պարոն Մակեյան, «Ժառանգությունը» նախատեսում է աշնանը փողոցային պայքար սկսել, չի բացառվում, որ օրակարգում կարող է լինել Սերժ Սարգսյանի՝ վարչապետ դառնալու ծրագիրը խափանելը։ Ի՞նչ կարծիք ունեք այդ մասին։
– Դա անիմաստ օրակարգ է. ասենք թե Սերժ Սարգսյանը չդարձավ վարչապետ, այլ պաշտոն զբաղեցրեց, տարբերությունը ո՞րն է, օրինակ, եթե նա պախան դառնա։ Որևէ տարբերություն չկա, ուղղակի դրա նախաձեռնողները ժամանակավորապես ակցիա են անում, հնարավոր է այդ պահին Սերժ Սարգսյանը հետքայլ անի, բայց երկու ամիս հետո, նորից իր մտածածն իրականացնի։ Ես ասում եմ՝ պետք է ձևակերպենք հստակ օրակարգ՝ ազատվել զորիբալայանական համակարգից։ Եթե ձևավորվի այդ օրակարգը, ապա ես կարծում եմ՝ բոլորով պետք է մասնակցենք ու ժողովրդին հրապարակ հանենք։ Եվ ոչ թե ասենք՝ եկեք հրապարակ բողոքի ակցիա անենք, որ Սերժ Սարգսյանը չլինի վարչապետ. է, հետո՞, եթե չէիք ուզում՝ ապրիլի երկուսին նույն ՕՐՕ-ն, «Ելք»-ը, իրենց մյուս ընդդիմադիր համարողները առանձին թող չմասնակցեին ընտրություններին։ Իրենք չգիտեի՞ն, որ առանձին գնալու պատասխանը Սերժ Սարգսյանի՝ իշխանությանը մնալն էր։
– Այսինքն՝ Դուք չեք բացառում փողոցային պայքարը, միայն եթե օրակարգն ավելի լայն լինի։
– Իհարկե։ Միայն օրակարգի հստակ ձևակերպում է պետք, այնպիսի օրակարգ, որ հանրությանը փողոց բերի։ Նույնիսկ ամենածայրամասային գյուղի բնակչին որ հարցնես, կասի՝ գենսեկը կարող է լինել Սերժ Սարգսյանը, ոչ մի տարբերություն չկա։ Հիմա ինքը կրիմինալ համակարգի նայողն է՝ համատեղությամբ նախագահ է։ Ապրիլին կդառնա նայող ու ՀՀԿ նախագահ, ի՞նչ տարբերություն։ Ուժային բոլոր կառույցներում իր հպատակներն են ու ցանկացած վարչապետի գլխին մի բան կարող են սարքել։
– Ըստ Ձեզ՝ փողոցային պայքարը դեռ արդիակա՞ն է. տարիները ցույց տվեցին, որ դա էլ ճանապարհ չէ։
– Եթե 10-20 տարվա սցենարներով գնանք փողոց՝ անիմաստ է։ Իսկ եթե մենք ձևակերպենք հստակ օրակարգ՝ կստացվի. ամեն բան չեմ ուզում բացել, որ իրենք դրա դեմը չառնեն։ Սարգսյանը ապրիլյան պատերազմից հետո ասաց՝ կուլակաթափ չի ուզում անել, մենք հենց ամենամեծ կուլակից պետք է սկսենք։ Իրենք ժողովրդի հաշվին են կուլակ դարձել, մարդիկ պետք է հասկանան՝ ինչո՞ւ թիվ մեկ կուլակը չի ուզում կուլակաթափ անել։ Հակառակ դեպքում վարչապետի հարցը մանկապարտեզ է։
– Դուք կոնկրետ ո՞ր ուժերի հետ եք տեսնում համագործակցության հնարավորություն։
– Եթե իմ ասած տարբերակով ընդլայնված հարցադրումներ լինեն, շատերը կհամախմբվեն։ Մենք հասել ենք մի կետի, որ նորմալ պայքարողների ռեսուրսը մինիմումի է հասել, բայց եթե նորմալ բացատրենք եղելությունը, ամեն ինչ էլ կստացվի։
Լուսանկարը՝ PanARMENIAN Photo-ի
