Մարդու իրավունքների եվրոպական դատարանը սկսել է ուսումնասիրել 33 բոսնիացիների՝ Ադրբեջանի դեմ ներկայացրած հայցերը, որոնք վերաբերում են Ադրբեջանում օտարերկրյա քաղաքացիների շահագործման, նախապես պայմանավորված գումարը չվճարելու, օտարերկրացիների անձնագրերը վերցնելու միջոցով տեղաշարժվելու իրավունքից զրկելու և մի շարք այլ դեպքերի:
Այս մասին հայտնում է ադրբեջանական azadliq.info լրատվական գործակալությունը:
Ադրբեջանցի հայտնի իրավապաշտպան Խալիդ Աղալիևի հաղորդմամբ` 33 Բոսնիայի և Հերցեգովինայի քաղաքացիներ դիմել են ՄԻԵԴ՝ պնդելով, որ խաբվել են Ադրբեջանի կողմից:
Նրանք իրենց հայցերում տեղեկացրել են, որ իրենք աշխատել են Բաքվում հայտնի Buta Saray, Bakı Ekspo Mərkəzi, 28 Mall առևտրի կենտրոնի և մի շարք այլ ընկերությունների շինարարություններում: Դիմումատուների հայցերում նշվում է, որ իրենք աշխատել են նաև Ադրբեջանի սպորտի և երիտասարդության նախարարությանը պատկանող Մինգաչևիր-Քուր օլիմպիական կենտրոնի շինարարական աշխատանքներում:
Հայցվորները ՄԻԵԴ ներկայացրած դիմումներում նշել են, որ Սպորտի և երիտասարդության նախարարությանը պատկանող շինարարությունում աշխատելու համար նախնական պայմաննավորվածության համաձայն` իրենց պետք է վճարվեր 1 ժամվա աշխատանքի դիմաց 5-7 դոլար, սակայն չի վճարվել:
Սկզբնական պայմանավորվածություն է եղել նաև բանվորներին համապատախսան ապրելու պայմաններ ապահովելու վերաբերյալ, սակայն Ադրբեջանի սպորտի և երիտասարդության նախարարությունը չի ապահովել այդ պայմանները, և դրա փոխարեն վերցրել են նրանց անձնագրերն ու պահելով խիստ անմխիթար պայմաններում՝ աշխատեցրել:
Անձնագրերը վերցվել են նրա համար, որպեսզի օտարերկրացի աշխատակիցները չկարողանան հեռանալ, ինչը թրաֆիքինգի դրսևորում է:
Միայն մարդու իրավունքների պաշտպանության տարբեր կազմակերպությունների դիմելուց հետո, օտարերկրյա բանվորների անձնագրերը վերադարձվել են և նրանց վճարվել է նախնական պայմանավորվածության գումարից շատ ավելի պակաս, չնչին գումար:
Դիմումատուներից յուրաքանչյուրը պահանջում է 15 հազար դոլար փոխհատուցում:
Իրավապաշտպանի կանխատեսմամբ` Մարդու իրավունքենրի եվրոպական դատարանը (ՄԻԵԴ) փոխհատուցման համար պահանջվող գումարի չափը կարող է կրկնապատկել և այդ պարագայում Ադրբեջանն առաջին անգամ կտուգանվի 1 մլն դոլարով: