«Բակո Սահակյանի առաջադրումը քաղաքական խնդիր է, և քաղաքական տարբեր ուժեր հարցի շուրջ կարող են տարբեր մոտեցում ունենալ, որը նորմալ երևույթ է»,- «Առաջին լրատվական»-ի հետ զրույցում ասաց Արցախի օմբուդսմեն Ռուբեն Մելիքյանը՝ անդրադառնալով հարցին, թե արդյոք Բակո Սահակյանի երրորդ անգամ առաջադրումը նահանջ չէր ժողովրդավարության առումով: «Այսօր կարևոր օր էր Արցախի համար: Անցումային շրջանի համար նախագահ էր ընտրվում: Սա ոչ միայն անցումային ժամանակահատված է նախագահի ընտրության մասով, այլ առհասարակ ամբողջ օրենսդրությունը Սահմանադրությանը համապատասխանեցնելու շրջան է»,- ասաց Մելիքյանը:
Անդրադառնալով Արցախի ժողովրդավարացմանը, Մելիքյանը նշեց, որ շատ հաճախ ժողովրդավարությունը և մարդու իրավունքները ներկայացվում են որպես մեկ ինստիտուտ, և մեկ կաթսայի մեջ փորձում են տարբեր ճաշ եփել, սակայն դրանք տաբեր երևույթներ են: Ժողովրդավարությունն ավելի շատ քաղաքական կատեգորիա է, իսկ մարդու իրավունքներն ավելի իրավական կոնկրետ բովանդակություն ունեցող համակարգ են:
Անդրադառնալով Արցախում ժողովրդավարության, խոսքի ազատությանը Մելիքյանը նշեց, որ չպետք է փորձել երևալ ավելին: «Մենք այն ենք, ինչ որ կանք և մեր այսօրվա իրավիճակը շատ օբյեկտիվ հանգամանքներով է պայմանավորված: Մենք ունենք բավական բարձր մակարդակի արժեքաբանություն»,- ասաց Մելիքյանը:
Առավել մանրամասն՝ տեսանյութում:
