«Ռեժիմը մեզ օրենքից դուրս քաղաքացիներ է համարում և մեզ պաշտպանելու ջանք չի գործադրում: Մենք դրանից շատ գոհ ենք: Առաջին անգամ առանց ոստիկանության Հայաստան ենք վայելում»,- «Առաջին լրատվական»-ի հետ զրույցում ասաց «Հիմնադիր խորհրդարան»-ի անդամ Հրաչիկ Միրզոյանը՝ անդրադառնալով մեր այն դիտարկմանը, թե ինչպես է պատահել, որ ոստիկանությունը չի ուղեկցում այսօրվա երթը:
«Հիմնադիր խորհրդարան»-ի անդամ խոսքերով՝ ոստիկանությունն այսօր բոյկոտել է իրենց, թեև վստահ է, որ ամեն ծառի հետևից քաղաքացիական հագուստով մի ոստիկան է հետևում երթին:
Հրաչիկ Միրզոյանը վստահ է՝ «Սասնա ծռերը» հայրենիքի համար անձնազոհության դիմելու օրինակ ցույց տվեցին: «Նրանք գաղափարական մարդիկ են, ժողովրդի կողմից ընդունվում են որպես հերոսներ, որքան էլ ռեժիմը փորձի նրանց ներկայացնել որպես ահաբեկիչներ»,- ասաց Միրզոյանը՝ հավելելով, թե ցավալի է, որ ոստիկաններ են զոհվել, բայց ոստիկանների մահը ընկնում է ռեժիմի խղճին, քանի որ նրանք են մարդկանց մղում ծայրահեղ արարքների: