Ղրղըզստանի նախագահ Ալմազբեկ Աթամբաևն առաջարկել է ԱՄՆ խոշոր կորպորացիաների ներկայացուցիչներին ուսումնասիրել համագործակցության և երկրում փոխշահավետ նախագծերի իրականացման հնարավորությունները: Այս մասին հայտնում է RIA Novosti-ն:
Բիշքեկում անցկացվում է պատմության մեջ առաջին՝ Ղրղըզստան-ԱՄՆ գործարար համաժողովը՝ խոշոր ամերիկյան ընկերությունների, ինչպես նաև երկու երկրների պետական կառույցների ներկայացուցիչների մասնակցությամբ: Ամերիկյան պատվիրակության կազմում են AGCO, Baker & McKenzie և General Electric ընկերությունների ներկայացուցիչները, Ամերիկա-ղրղըզական գործարար խորհրդի հիմնադիր անդամները, AES, Mobilized Construction, American Councils for International Education, Coca-Cola և այլ ընկերությունների ներկայացուցիչներ:
«Ղրղըզստանն արդեն դրախտ է դառնում բիզնեսի համար, ազատ երկիր, որտեղ կարելի է ներդրումներ անել և մեծ գումարներ վաստակել՝ աշխատելով ազնիվ և թափանցիկ»,- հայտարարել է Աթամբաևն ԱՄՆ առաքելության ներկայացուցիչների հետ հանդիպման ժամանակ: