Վրաստանը, որը ժամանակին հրավիրել է ֆերմերների աշխարհի տարբեր անկյուններից, այսօր սահմանափակում է մտցնում օտարերկրացներին հողատարածք վաճառելու հարցում։ Օտարերկրացիներին գյուղատնտեսական նշանակության հողերի վաճառքի մորատորիումն արդեն ուժի մեջ է, իսկ ապագայում համապատասխան արձանագրությունը կհայտնվի նաև երկրի սահմանադրությունում։ Այս մասին հայտնում է BBC-ն։
Նախկին իշխանությունները հույս ունեին, որ օտարերկրացի ֆերմերների փորձն ու ներդրումները կօգնեն Վրաստանի գյուղատնտեսության աշխուժացմանը, սակայն այսօր կառավարությունում ասում են, որ հողերի նման ազատ վաճառքը երկրում, որտեղ բնակչության մեկ շնչին բաժին է ընկնում միջինը ընդամենը 0,24 հեկտար գյուղատնտեսական տարածք, արդարացված չէ և հակասում է ազգային շահերին։
Մորատորիումը խորհրդարանի կողմից ընդունվել է արագացված ռեժիմով հունիսի 16-ին, կգործի մինչև Վրաստանի սահմանադրության նոր խմբագրման ուժի մեջ մտնելը։
Համաձայն Արդարադատության նախարարության՝ օրենսդրական փոփոխությունները չեն անդրադառնա այն հողակտորերի վրա, որոնք արդեն օտարերկրացի սեփականատեր ունեն։
