Ռուս երգչուհի, հայտնի «Բլեստյաշիե» խմբի նախկին անդամ Յուլիա Կովալչուկը tele.ru պարբերականին տված հարցազույցում պատմել է իր համային նախընտրությունների մասին, այն մասին, թե ինչպես է հագուստներ ընտրում և թե ինչն է իրեն սկզբում գրավել ամուսնու՝ Ալեքսեյ Չումակովի արտաքինի մեջ:
«Նորաձևության թրենդերը կուրորեն կրկնօրինակելն ինձ համար չէ: Ես, իհարկե, հետևում եմ միտումներին, բայց ոչ ֆանատիկորեն, ձեռք եմ բերում միայն այն, ինչն ինձ սազում է և ինչով ինձ հարմար է»,- ասել է Կովալչուկը: Երգչուհին նշել է, որ հաճախ հագուստի ընտրությունը կախված է ոչ միայն միջոցառումից, այլև իր տրամադրությունից:
Նա ասել է, որ իր ամուսնու ճաշակը «հիանալի» է համարում, իսկ դրա պատճառը տեսնում է գեղեցիկի զգացման մեջ, որը նրան ի ծնե ներշնչել են ծնողները»:
«Հիշում եմ՝ ինչպես շատ տարիներ առաջ, երբ մեր սիրավեպի թեժ ժամանակն էր, նա հանկարծ ինքնաբուխ առաջարկեց գնալ իր ծնողների հետ ընթրելու և միաժամանակ ծանոթանալու: Ես, ինչպես ջինսով և շապիկով էի, այդպես էլ գնացի: Նրա մայրը (Ալեքսեյ Չումակովի մայրը՝ Լիլիա Ավանեսովնան, ծնունդով Ղարաբաղից, այժմ մահացած է), ցավոք, արդեն հիվանդ էր, բայց հայկական տարբեր ուտեստներ էր պատրաստել՝ հրաշալիորեն համեղ: Ես այն ժամանակ ապշեցի՝ նա ինչ տեսք ուներ՝ սանրվածք, կոկիկ մատնահարդարում, ներկված եղունգներ, շրթներկ՝ շուրթերին: Եվ ես հասկացա՝ որտեղից Լյոշան ճաշակ և ոճ ունի: Ես սկեսուրիս երբեք չեմ տեսել չսանրված, առանց մատնահարդարման: Հենց սկեսուրս, մորիցս հետո, նույնպես որոշակի սանդղակ սահմանեց: Նույնիսկ եթե ես շատ հոգնած եմ կամ հիվանդ, չեմ մոռանա հայելու մեջ նայել: Իմ արտաքին տեսքին բավական մանրակրկտորեն եմ վերաբերվում: Ուզում եմ դուր գալ և՛ ինձ, և՛ սիրելի տղամարդուս»,- ասել է Կովալչուկը:
