Մայիսի 26-29-ին Թբիլիսում տեղի ունեցած ՆԱՏՕ-ի խորհրդարանական վեհաժողովում երկու անգամ բախում է եղել Ադրբեջանի պատվիրակության ներկայացուցիչների հետ. այսօր հրավիրված ասուլիսի ընթացքում այս մասին ասաց հայկական պատվիրակության անդամներից Էդմոն Մարուքյանը:
Մարուքյանը նշեց, թեև իրենց նպատակը վեհաժողովից Հայաստանի շահերը ներկայացնելն է, ոչ թե Ադրբեջանի պատվիրակների հետ ռեակցիոն բախման գնալը. այնուամենայնիվ, կարևոր է նաև հայկական կողմի տեսակետը ներկայացնելը:
Մարուքյանի խոսքով՝ Վրաստանի պատվիրակն է «ՌԴ գործընկերոջից մրցակից» թեմայով զեկույց ունեցել և բոլոր կոնֆլիկտային խնդիրները ներկայացրել մեկ հարթության մեջ, թե Ռուսաստանն ամենուր մասնակցություն ունի:
«Ես Վրաստանի ներկայացուցչին ասացի, որ ընդհանրացում չի կարելի անել, և ԼՂ կոնֆլիկտն այն կոնֆլիկտներից է, որտեղ ռուսական զորք չկա: Նշեցի, որ ես երբեք Վրաստանը չէի համեմատի Ադրբեջանի հետ, որովհետև իրենց պետությունը երբեք չի հարձակվում Օսեթիայի վրա և զինվորների մարմինները չի խոշտանգում ու վերադարձնում Կարմիր խաչի միջնորդությամբ»,- ասաց Մարուքյանը և նշեց, որ չնայած հաստատել է, որ ՀՀ-ում ռուսական ռազմաբազա կա, բայց այն որևէ մասնակցություն չունի ղարաբաղյան հակամարտության հարցում:
Մարուքյանի խոսքով՝ իր ելույթից հետո շատ պատվիրակներ մոտեցել և իրենց ասել, որ իրենք տեղյակ չէին Արցախի կոնֆլիկտի մանրամասներին:
Էդմոն Մարուքյանն էլ մեկ այլ հարցի անդրադարձավ, երբ կրկին ադրբեջանական պատվիրակությունը բնապահպանական թեմայով զեկույցի քննարկման ժամանակ հայտարարել էր, թե ԼՂՀ «օկուպացված» տարածքներում բնապահպանական աղետ է, Ջեբրաիլի անտառներն այրվում են: Հարցին միջամտել է Մարուքյանը և նշել, որ որևէ հայտարարություն իրականությանը չի համապատասխանում, չկան ո՛չ օկուպացված, ո՛չ այրվող անտառներ, և հայտարարում են՝ հայտարարելու համար:
«Ադրբեջանական կողմի խնդիրը հերյուրանքներ տարածելն է, պատասխան կլինի՝ հետ կկանգնեն, չի լինի՝ կգնան առաջ»,- ասաց նա:
Մանրամասները՝ տեսանյութում: