«Ծառուկյան» դաշինքի ցուցակով պատգամավոր ընտրված Նորա Առուստամյանը, որը մանդատ է ստացել նախօրեին՝ Խաչիկ Մանուկյանի մանդատը վայր դնելու արդյունքում: Ավելի վաղ նույն ընտրական տարածքից ինքնաբացարկի դիմում էր գրել նաև նախկին պատգամավոր Լյովա Խաչատրյանը:
Հարցին, թե ինչպե՞ս է պատրաստվում աշխատել՝ հաշվի առնելով, որ ըստ լուրերի, Խաչիկ Մանուկյանին ստիպեցին հրաժարվել մանդատից Նորա Առուստամյանը պատասխանեց. «Ստիպողաբար որեւէ բան տեղի չի ունեցել: Մի ման եկեք մի բան, որը չկա: ԿԸՀ կայքը բոլորի համար հասանելի է, իմ հավաքած ձայների թիվը կարող եք տեսնել, ինքնաբացարկների դիմումների հիման վրա «Ծառուկյան» դաշինքի որոշման արդյունքում ստացել եմ ինձ հասանելիք մանդատը»:
Անդրադառնալով տեղեկություններին, որ իր հայրը՝ Սեդրակ Առուստամյանը կես մլն դոլար էր ծախսել ընտրությունների ընթացքում եւ դա է պատճառը, որ ինքը հայտնվել է խորհրդարանում, նորընտիր պատգամավորն արձագանքեց. «Ես Ձեզ խնդրում եմ, ինտրիգ ման մի եկեք այնտեղ, որտեղ չկա… Իմ կենսագրությունը շուտով հասանելի կլինի»:
Նորա Առուստամյանն ասաց, որ լինելու է ԱԺ պետաիրավական և մարդու իրավունքների հանձնաժողովում: Իսկ երկրում մարդու իրավունքների պաշտպանության վիճակին անդրադառնալով էլ նշեց. «Ես ձեզ խնդրում եմ, որպես երիտասարդ ես ունեմ բավականին աշխատանք եւ գիտեմ ինչ պետք է անեմ: Դուք եւս ապրում եք ինձ հետ նույն երկրում: Մենք այստեղ նրա համար ենք, որ փորձենք խնդիրներին լուծում տալ»: