«Հրանուշ Հակոբյանը հավերժ է՝ Լենինի ու Ստալինի նման»,- «Առաջին լրատվական»-ի հետ զրույցում ասաց միջազգայնագետ, վերլուծաբան Սարգիս Հացպանյանը՝ անդրադառնալով Սփյուռքի նախարարի պաշտոնում Հրանուշ Հակոբյանի վերանշանակմանը:
Հացպանյանի խոսքով՝ տիկին Հակոբյանը հավերժ կմնա նախարար, քանի որ «տիկինը սովետի ժամանակ՝ սովետ է, կոմունիստի հետ՝ կոմունիստ է, կոմսոմոլ է, կոմսոմոլը վերջացավ՝ ՀՀՇ է. ՀՀՇ-ից հետո «Հանրապետություն է, դա էլ վերջացավ՝ երկրապահ է, Երկրապահը վերջանում է՝ Հանրապետականն է սկսվում: Վաղը եթե ես մտնեմ քաղաքական դաշտ և հիմնեմ Սարգիս Հացպանյանի կուսակցություն՝ նա ինձ հետ կլինի: Նա քամելեոնի պես փոխում է գույները: Նա անմահ է: Նա կարողանում է պահի տակ շատ ճիշտ կողմնորոշվել: Նրանից լավ ոչ մեկը չի կարող այդքան լավ կողմնորոշվել»,- հավելեց Հացպանյանը:
Հացպանյանի խոսքով՝ Հայաստանում Սովետն անմահ է: «Դուք պատկերացնում եք մի երկիր, օրինակ՝ Լատվիան, Էստոնիան, որտեղ կոմսոմոլի ղեկավար եղած մարդը նախարար լինի: Եթե մի նման օրինակ բերեք, ես անունս կփոխեմ»,- նկատեց Հացպանյանը:
Մեր զրուցակցի խոսքով՝ մինչդեռ Սփյուռքի նախարարությունը շատ կարևոր ֆունկցիա ունի, նախարարությունը ներգաղթ պետք է կազմակերպի Հայաստան: «Ոչ թե «Արի տուն-մարի տուն» լոլոներով մարդկանց խաբել, մարդկանց ձեռք առնել, այլ իրապես մարդկանց բերել Հայաստան, երաշխիք կանգնել, արժանապատիվ կյանքով ապահովել, աշխատանք տալ, որ այդ մարդը մերվի մեր երկրին, հողին: Սփյուռքի նախարարությունը պետք է դառնա ներգաղթի նախարարություն: Հրանուշ Հակոբյանը 2008 թվականից մինչև այսօր ՀՀ-ից արտագաղթած յուրաքանչյուրի քայլին նպաստել է անձամբ, իր անգործությամբ: Նրա տեղը եթե ես լինեի, ու եթե չկարողանայի դրսում ապրող հային բերել ու կապել իր հայրենիքին, ապա ես ինձ հանրապետության հրապարակում կկախեի: Կառավարության շենքի առաջ իբրև չհաջողած նախարարի՝ ինքս ինձ կախաղան կհանեի, որ ես իմ տեղում չեմ եղել»,- ասաց Հացպանյանը:
Նա բերում է Իսրայելի օրինակը, որտեղ Սփյուռքի նախարարությունը կոչվում է կլանման նախարարություն: «Այդ նախարարությունը փոշեկուլի պես կլանում, աշխարհից, Փարիզից հրեային տանում է իր երկիր՝ Իսրայել, և իրենց համար ամենաթշնամական հատվածում՝ Պաղեստինի հետ սահմանին, գյուղատնտեսությամբ է զբաղվում, վարուցանք է անում՝ 24 ժամ զգալով պաղեստինցի արաբի թշնամության շունչը: Դա այդպես է, քանի որ Իսրայելը պետություն է, հրեան ժողովուրդ է և ծրագիր ունի, որը իրականացնում է: Ցավալի է, որ սա չի կարելի մեր մասով ասել»,- նկատեց Հացպանյանը:
Մեր զրուցակցի խոսքով՝ Հայաստանում պաշտոնյաները միայն խոսում են ներգաղթի մասին, բայց ոչ մի գործնական քայլ չեն անում: Ավելին, Սփյուռքի նախարարի պաշտոնում նշանակում են մեկին, որին Սփյուռքը չի վստահում: Նշանակում են մեկին, որը սփյուռքահայերին դրել է կթան կովի տեղ, չորքոտանիի տեղ: «Սփյուռքահայերը նեղացած են Հրանուշ Հակոբյանից: Նրանք տիկին նախարարի աչքերում միայն դոլարի նշան են, ոչ ավելի»,- ասաց Հացպանյանը:
Ի դեպ, վերջերս Հացպանյանը իր հարցազրույցներից մեկում Սփյուռքի նախարարության աշխատողներին պորտաբույծներ է անվանել, որից հետո Սփյուռքի փոխնախարար Սերժիկ Սրապիոնյանը զանգահարել է Հացպանյանին և հանդիպում խնդրել, որի ժամանակ ասել է, թե իրենք նեղացած են այդ արտահայտության համար: Զրույցի ժամանակ Հացպանյանը պնդել է, որ ինքը կարող է հիմնավորել, որ Սփյուռքի նախարարությունում պորտաբույծներ են աշխատում, և պատրաստ է դա անել ցանկացած հեռուստաընկերության եթերում բանավեճի ժամանակ: Սրապիոնյանը խոստացել է կազմակերպել մի այդպիսի բանավեճ, սակայն Հացպանյանը երկու ամիս է՝ սպասում է Սփյուռքի փոխնախարարի զանգին:
«Նրանք վախենում են այդ բանավեճից: Ես հիմա հերթական անգամ պնդում և հայտարարում եմ, որ Սերժիկ Սրապիոնյանը, Հրանուշ Հակոբյանը և նախարարության հետ մյուս առնչվողները պորտաբույծներ են: Եթե իրենք ունեն այդքան համարձակություն, թող գան, և ես հատ առ հատ կնշեմ իրենց սխալները և կասեմ, թե որն է այլընտրանքը: Կասեմ, թե ինչ պետք է անել իրականում, ոչ թե գնալ Լոս Անջելեսները, մարաթոններ կազմակերպել, որ այդ փողով Քելբաջարի ճանապարհը սարքեն: Հայաստանի օլիգարխների ծախսերը՝ սուրճի ու սիրածների և սաունաների վրա, դրանով կարելի է հարյուր հատ Քելբաջարի ճանապարհ սարքել: Այս ամբողջի մեղքը Սփյուռքի նախարարության վզին է: Թող դուրս գան տակից»,- եզրափակեց Հացպանյանը: