6-րդ գումարման ԱԺ-ում հաստատվել են մշտական հանձնաժողովները, նոր ԱԺ-ում չի լինելու Մարդու իրավունքների մշտական հանձնաժողով, այն միացվելու է Պետաիրավական հանձնաժողովին: «Առաջին լրատվական»- ի հետ թեմայի շուրջ զրույցում «Ընդդեմ կամայականությունների» ՀԿ նախագահ Լարիսա Ալավերդյանը կարծիք հայտնեց, որ դա ամենաանհաջող որոշումն է. «Ավելի վատ որոշում չէր կարող լինել: ԵՄ հետ նոր փուլ սկսելու մտադրությունների փուլում, որտեղ Մարդու իրավունքները կենտրոնական հարց են, այսպիսի որոշում կայացնելը հարիր չէ, բացի դրանից՝ փատորեն այնպես են հաշվարկել, որ միակ ընդդիմադիր ուժը հանձնաժողով չղեկավարի:
Իրավապաշտպանի դիտարկմամբ՝ Մարդու իրավունքների հանձնաժողովը Պետաիրավական հանձնաժողովին միացնելը ավելի քան տարօրինակ է, որովհետև մարդու իրավունքների պաշտպանությունը ենթադրում է մարդու իրավունքների պաշտպանություն, եթե դրանք ոտնահարվում են պետական, իրավական համակարգի կողմից:
Անդրադառնալով հարցին, թե իսկապես հնարավորություն կտրվի՞ ընդդիամդիր պատգամավորներին աշխատել և ազդեցություն ունենալ, Լ. Ալավերդյանը նշեց, որ նրանք, ովքեր այսօր իշխանություն են, ազատ չեն. «Յուրաքանչյուր պատգամավոր պետք է արտահայտի իր կարծիքը ոչ թե սահմանափակվի միայն կոճակ սեղմելով»:
Լ. Ալավերդյանի դիտարկմամբ՝ ընտրությունների ժամանակ այնպիսի երևույթներ եղան, որոնք պետք է հասցեական դատապարտվեին իշխանության կողմից, այլ ոչ թե արդարացվեին, եթե չեն դատապարտվում, դա նշանակում է, որ քողարկում են և խրախուսում:
Իրավապաշտպանի խոսքով, այն որ հետընտրական զարգացում չի եղել փողոցում, դա չի նշանակում, որ հասարակությունը մարսել է այդպիսի ընտրություները. «Ախտը ոչ թե բուժվել է, այլ կոծկվել, և դա վտանգավոր է»: Լ. Ալավերդյանն ընդգծեց, որ կողմ չէ բախումնային սցենարներին, բայց դրանք չեն բացառվում, հակառակը՝ հասունանում են: Նրա կանխատեսմամբ՝ այս ԱԺ-ն ավելի մեծ մարտահրավերների առջև է կանգնած, քան նախորդները:
Մանրամասները՝ տեսանյութում: