Կառավարությունն օրերս հաստատեց Պետական գույքի մասնավորեցման 2017-2020 թթ ծրագիրը, որով նախատեսվում է մասնավորեցնել 47 պետական ընկերություն, որոնցից 23-ը՝ սեփականաշնորհման նախկին ծրագրով: Այս ընկերությունների թվում է նախկին «Հայֆիլմ» կինոստուդիան:
Թեմայի շուրջ «Առաջին լրատվական»- ի հետ զրույցում իր դիտարկումները և մտահոգությունները ներկայացրեց կինոռեժիսոր, հրապարակախոս Տիգրան Խզմալյանը: Նրա խոսքով՝ կինոն, իհարկե, նաև տնտեսություն է, բայց առաջին հերթին այն ազգային մշակույթ է:
«Կարելի՞ է արդյոք սեփականաշնորհել մշակույթը, դա անհնար է սեփականաշնորհել: Այն երկրները, որոնք ունեն քաղաքականություն, գաղափարախոսություն և ազգային արժեքներ ու արժանապատվություն, ունեն քաղաքական նպատակներ, նրանք գոնե կինոն չեն սեփականաշնորհում, որովհետև կինոն արտացոլում է ազգային գաղափարախոսությունը»,- նշեց կինոռեժիսորը:
Նա նաև ընդգծեց, որ Հայաստանի իշխանություններն այս քայլով ևս մեկ անգամ հաստատեցին, որ չունեն ազգային գաղափարախոսություն, ուստի պատրաստ են վաճառել կինոն. «Սա ողբերգություն է: Հայաստանում կինոն չի կարող գոյատևել որպես մասնավոր զբաղմունք, որպես մասնավոր բիզնես, մենք ԱՄՆ-չենք»:
«Մենք չունենք կինոյի հանդեպ պետական մոտեցում, չունենք կինոարտադրություն: Դրա վառ ապացույցն է, որ Եղեռնի 100-ամյակը ոչ մի արտացոլում չգտավ մեր կինոյում, նաև գրականության մեջ,- նշեց Տ. Խզմալյանը:- Մենք, որպես մշակույթ, որպես ազգային կինոարվեստ չկարողացանք խոսել աշխարհի հետ, չկարողացանք արտահայտվել»:
Մանրամասները՝ տեսանյութում: