Եվրամիությունը մեծապես սատարում է Մինսկի խմբի համանախագահների գործողություններին և նրանց կողմից հնչեցված վերջին հայտարարությանը: Եվրոպայի օրվա եզրափակիչ միջոցառմանը լրագրողների հետ ճեպազրույցում այս մասին ասաց Հայաստանում ԵՄ պատվիրակության ղեկավար, դեսպան Պյոտր Սվիտալսկին: «Մենք հավատում ենք, որ այս հակամարտության համար չկա ռազմական լուծում, և որ ստատուս- քվոն այլևս հնարավոր չէ պահպանել: Մենք հավատում ենք, որ հրադադարի համաձայնագիրը պետք է հարգվի»,-ասաց դեսպանը:
Սվիտալսկին նշեց, որ Եվրամիությունը պատրաստ է Լեռնային Ղարաբաղի հակամարտության կարգավորումից հետո ֆինանսական աջակցություն տրամադրել բնակչությանը: «Երբ այս հակամարտությունը լուծվի, և երբ խաղաղությունը վերադառնա Արցախ, Եվրամիությունը պատրաստ է զգալի գումարներով աջակցել այդ տարածքի բնակիչներին»,-ասաց նա։
ԵԱՀԿ Մինսկի խմբի համանախագահները՝ Իգոր Պոպովը (ՌԴ), Ստեֆան Վիսկոնտին (Ֆրանսիա) և Ռիչարդ Հոգլանդը (ԱՄՆ) մայիսի 18-ին հանդես են եկել հայտարարությամբ։
ԵԱՀԿ պաշտոնական կայքում հրապարակված հայտարարության մեջ համանախագահները նշել են, որ տարբեր հավաստի աղբյուրներից հավաքած տեղեկությունների համաձայն՝ մայիսի 15-ին Ադրբեջանի Զինված ուժերը հրթիռային կրակ են բացել շփման գծի երկայնքով՝ հարված հասցնելով ռազմական տեխնիկային։
