Մի քանի օր առաջ՝ մայիսի 19-ին, կայացել է «Նաիրիտ գործարան» ՓԲԸ-ի գույքի մասնակի աճուրդը: Աճուրդի են հանվել սարքավորումներ, հաստոցներ, պահեստամասեր (վենտիլների, փականների), քիմիական նյութեր, տարողություններ և այլն:
«Նաիրիտ»-ի արհմիության նախագահ Հրաչ Թադևոսյանն «Առաջին լրատվական»-ի հետ զրույցում ասաց, որ սնանկությունից հետո օրենքը թույլ է տալիս որոշակի ապրանք հանել աճուրդի: Եվ այս աճուրդը հենց դրա շրջանակներում է: Թադևոսյանը նաև նշեց, որ աճուրդի են հանվում հիմնականում այն ապրանքները, սարքավորումները, որոնք գործարանին պետք չեն, և հնարավոր վերագործարկման պարագայում դրանց անհրաժեշտությունը չի լինի:
«Գործարանի ղեկավարության կողմից տարուց ավելի է՝ կա մշակված ցուցակ, որում ներառված են այն սարքավորումները, որոնք արտադրությանը ոչ պիտանի են, ու հիմա էլ հենց այդ ապրանքներն են հանվել աճուրդի, որ դրանից գոյացած գումարներով աշխատավարձ փակվի»,- ասաց Թադևոսյանը:
Թադևոսյանի խոսքով՝ արդեն իսկ երկու աճուրդ իրականացվել է, առաջիկայում մի քանի ամսվա մեջ նախատեսված է նաև երրորդ աճուրդը, որի ժամանակ կվաճառվեն ցանկում եղած մյուս սարքավորումները:
Չափիչ, ստուգիչ սարքերի արտադրամասի պետ Արմեն Մանուկյանը ևս «Առաջին լրատվական»-ի հետ զրույցում նշեց, որ աճուրդի հանվել են այն ապրանքները, սարքավորումները, որոնք պիտանի չեն: Բայց իրենց արտադրամասի մասով ևս ցուցակ են ներկայացրել, թե որ գույքն իրենց անհրաժեշտ չէ, որը կարելի է վաճառել: «Մենք ցուցակ ենք ներկայացրել, ցուցակը ամբողջ գործարանի, բոլոր արտադրամասերի մասով բավական մեծ է»,- ասաց Մանուկյանը՝ հավելելով, որ աճուրդից գոյացած գումարները առաջին հերթին ուղղվելու են աշխատավարձերի վճարմանը ըստ կարևորության՝ գործարանի աշխատակազմ, գործարանի թոշակառու աշխատողների և հաշմանդամ աշխատողների աշխատավարձեր:
Եվ Թադևոսյանը, և Մանուկյանը մեզ հետ զրույցում պնդեցին, որ գործարանի վերագործարկումը անհրաժեշտութուն է: «Եթե կառավարությունը լավ մտածի, կտեսնի, որ գործարանը պիտանի է վերագործարկման համար, և մեր ուժերով կարող ենք այն աշխատեցնել: Գործարանը եթե աշխատի, բավական մարդ և՛ աշխատանք կունենա, և՛ ապահովված կլինի: Իսկ դա կնպաստի արտագաղթի թվերի կրճատմանը»,- ասաց Մանուկյանը
Հիշեցնենք, որ անցած տարի նոյեմբերի 28-ին Շենգավիթ վարչական շրջանի ընդհանուր իրավասության դատարանը՝ դատավոր Արմեն Չիչոյանի նախագահությամբ, որոշում կայացրեց սնանկ ճանաչել «Նաիրիտ գործարան» ՓԲԸ-ն: «Հայաստանի Էլեկտրական ցանցեր» ՓԲԸ-ն դեռևս 2015-ին դիմել էր դատարան՝ «Նաիրիտ»-ը սնանկ ճանաչելու պահանջով: Դատարան ներկայացրած դիմումով «Հայաստանի էլեկտրական ցանցեր» ՓԲԸ-ի ներկայացուցիչը հայտնել է, որ ՀՀ Հանրային ծառայությունները կարգավորող հանձնաժողովի 2007թ. հոկտեմբերի 16-ի թիվ 422-Ն որոշմամբ հաստատված՝ էլեկտրաէներգիայի առքուվաճառքի պայմանագրի օրինակելի ձևին համապատասխան՝ 2009թ. մայիսի 26-ին ՀԷՑ-ի և «Նաիրիտ գործարան» ՓԲԸ-ի միջև կնքվել է էլեկտրական էներգիայի մատակարարման պայմանագիրը, սակայն գործարանը չի կատարել իր պարտավորությունները՝ վճարումները:
Հիշեցնենք նաև, որ Համաշխարհային բանկը վերջին անգամ «Նաիրիտ»-ում անցկացրած աուդիտից հետո բացասական եզրակացություն տվեց գործարանի վերագործարկման հետ կապված: Չնայած ՀԲ-¬ի բացասական եզրակացությանը` «Նաիրիտի» մասնագետները վստահ են, որ գործարանի մասնակի վերագործարկում հնարավոր է նույնիսկ ներկա տեխնիկական ապահովվածության պարագայում, եթե կատարվեն որոշակի ներդրումներ: Անցած տարի գործարանում հրավիրված քննարկման ժամանակ «Նաիրիտի» գլխավոր տնօրեն Ռուբեն Սաղաթելյանը հայտնեց, որ ՀԲ ուսումնասիրության համաձայն` գործարանի պարտավորությունները գերազանցում են 121 մլրդ դրամը (շուրջ 250 մլն դոլար), որի մեջ մտնում է ԱՊՀ Միջպետական բանկի չմարված վարկը: