Վրաստանը, Թուրքիան և Ադրբեջանը 2017թ. հունիսին և սեպտեմբերին նախատեսում են համատեղ զորավարժանքներ անցկացնել: Ինչպես հաղորդում են վրացական ԶԼՄ-ները, այս մասին Թբիլիսիում հայտարարել է Վրաստանի պաշտպանության նախարար Լևան Իզորիան ադրբեջանցի գործընկեր Զաքիր Հասանովի հետ հանդիպմանը:
Ադրբեջանի ՊՆ նախարարը պաշտոնական այցով գտնվում է Վրաստանում: Պաշտպանական գերատեսչությունների ղեկավարները քննարկել են ռազմավարական գործընկերությանը և տարածաշրջանային անվտանգությանը վերաբերող հարցեր:
Մայիսի 23-ին Իզորիան, Հասանովը և Ֆիքրի Ըշըքը կհանդիպեն Բաթումիում, որի ընթացքում կստորագրվի պաշտպանական ոլորտում համագործակցության հուշագիր:
«Այս համագործակցության դինամիկան դրական է և աճող: Այս տարի համատեղ զորավարժանքներ ենք ունենալու: Մոտ երկու շաբաթից ինչպես Վրաստանի, այնպես էլ Ադրբեջանի և Թուրքիայի հատուկ օպերացիաների ուժերը համատեղ զորավարժություններ կանցկացնեն»,-ասել է Իզորիան:
