«Ես մնում եմ թիմում, Պարոն Ծառուկյանը ոնց որոշի, ես պատրաստ եմ տենց անել»:«Ծառուկյան» դաշինքի պատգամավոր Վահան Կարապետյանն այս մասին ասաց խորհրդարանում լրագրողների հետ զրույցում:
Հարցին, եթե սպասում է Գագիկ Ծառուկյանի որոշմանը, ապա ինչո՞ւ ԿԸՀ-ից հետ վերցրեց ինքնաբացարկի դիմում, նա պատասխանեց, որ ինքնակամ է ԿԸՀ ներկայացրել ինքնաբացարկի դիմումը, հետո էլ քաղաքական որոշում է կայացվել, հետ է վերցրել. «Պարոն Ծառուկյանը կորոշի, թե որտեղ կլինեմ ես: Մեկ է, ես մնալու եմ թիմում»:
«Հիասթափված ամեն ինչից՝ հաջորդ օրը գնացի պարոն Ծառուկյանի մոտ: Ասացի, որ ես ինքս չեմ ուզում լինել պատգամավոր», – պարզաբանեց նա: Իր հիասթափությունը պատգամավորը բացատրեց ստացած քվեների քանակով և թիմակիցների աշխատանքով. «Մոտ 15-16 հազար ձայն էի ակնկալում»:
Վահան Կարապետյանը նաև բացատրեց, թե ինչու որոշեց հետ վերցնել ինքնաբացարկի դիմումը. «Թիմը պահանջեց այդպես: Ես գնացի, դիմեցի պարոն Ծառուկյանին, ասացի՝ ես ինքս չէի ուզում, բայց թիմը պահանջում է, ի՞նչ անենք: Որոշեցինք, որ դիմումը ես հետ վերցնեմ»:
Անդրադառնալով դիտարկմանը, որ տպավորություն կա, թե իր վրա կուսակցությունից ճնշում կա և խոսելով նախընտրական շրջանում իր հետ կատարված միջադեպից՝ Վահան Կարապետյանը հերքեց, որ իրեն ծեծի են ենթարկել. «Մենք բոլորս էլ գիտենք, որ ընտրությունների ժամանակ որոշակի լարվածություն եղավ: Ինձ չէին էլ ծեծել: Լարվածություն չի նշանակում ծեծել: Ռեանիմացիա էին ուղարկում, բայց այդպիսի բան չի եղել: Չափազանցված էր հայտարարությունը»:
Մանրամասները՝ տեսանյութում: