Երևանի ընտրություններն ավարտվեցին: Դրանց մասնակցել է 345 226 ընտրող, որը կազմում է 40,99 տոկոսը: Սա այն բացառիկ դեպքերից է, որ լրիվությամբ կարող ենք համաձայնել ՀՀԿ փոխնախագահ Արմեն Աշոտյանի այն դիտարկմանը, որ ընդդիմադիր էլեկտորատը մնացել է տանը: Այլ խոսքով` իշխանություններին հաջողվել է մոբիլիզացնել իրենց վարչական ու ֆինանսական ռեսուրսները և 41% մասնակցությունը ենթադրում է, որ քվեատուփերում ՀՀԿ նշումով քվեաթերթիկների թիվն, ամենայն հավանականությամբ, տատանվելու է 65-70%-ի սահմաններում:
Նման համոզման ենք գալիս, երբ ուսումնասիրում ենք մասնակցության ցուցանիշներն` ըստ վարչական շրջանների: Ընտրությունները եղել են ապաքաղաքական, ինչի վկայությունն է ընտրողների բարձր մասնակցությունը Երևանի «ոչ քաղաքային» համայնքներում` Նուբարաշենում և Նորք Մարաշում (համապատասխանաբար`52,66 և 50,67%):
ՀՀԿ-ն Երևանում կոնսոլիդացրել է իր էլեկտորատն առավելագույնս, ինչի ապացույցներն են ընտրողների ակտիվությունն այն վարչական շրջաններում` Ավանում և Աջափնյակում (համապստասխանաբար` 52,75 և 45,29 տոկոս մասնակցություն), որոնք կառավարող կուսակցության «բներն» են: Դրան հակառակ` հարաբերականորեն ընդդիմադիր Կենտրոն և Արաբկիր համայնքներում ընտրողների ակտիվությունը երևանյան միջինից ցածր է եղել:
Ընտրություններում մեծ դեր են խաղացել ընտրակաշսռքն ու վարչական ռեսուրսը, հակառակ պարագայում`դժվար է բացատրել թշվառության շեմին գտնվող Շենգավիթի ընտրողների ակտիվ մասնակցությունը` 46,54%:
Կասկածից վեր է, որ ընդդիմությունը պարտվել է ու ոչ այնքան Երևանի քաղաքապետի պաշտոնի համար մղվող պայքարում, որքան` քաղաքական հեռանկարի իմաստով: Ընդդիմադիր էլեկտորատը մնաց տանը, որովհետև «Ելքից» չստացավ այն ազդակը, արժեքային այն կողմնորոշիչները, որոնք բնութագրական պետք է լինեին նոր ընդդիմության համար: «Ելքի» քարոզարշավն իսկապես ձախողված էր. սեփական էլեկտորատը կապիտալացնելու փոխարեն` դաշինքը «15000» դրամի նախաձեռնությամբ փորձեց խաղալ Տարոն Մարգարյանի էլեկտորալ տիրույթում` այնտեղից չքաղելով ոչինչ, բայց չհասցնելով հավաքել իր «բերքը»:
«Երկիր ծիրանի» կուսակցությունն այդպես էլ չհաղթահարեց մուտքի «շնորհանդեսային» բարդույթը` չթիրախավորելով հասարակական այն խմբերին, որոնք հստակ կողմնորոշվել են դեպի Զարուհի Փոստանջյանը:
Հետընտրական զարգացումներ չեն լինելու, եթե նույնիսկ Զարուհին խոսում է «ազգային հետընտրական ճակատ»-ների ստեղծման մասին կամ սպառնում է «օր ու արև չտալ» Տարոն Մարգարյանին: Մխիթարական է գոնե այն, որ «Ելք»-ում հասկացել են հետընտրական զարգացումնետի գնալու արկածախնդրությունը:
Այսօր տեղի է ունեցել իշխանության և հասարակության լյումպենացված հատվածի հերթական գործարքը և իսկապես տգեղ է մտնել իշխանության ու ժողովրդի արանքը, սակայն ամենևին էլ տգեղ չէ «Ելքի» առաջնորդներին հարցնել` ինչպե՞ս հաջողացրին ավելի սերտացնել Հանրապետականի ու հասարակության «դաշինքը»: Անտաղանդ լինելու համար էլ տաղանդ է պետք ունենալ:
Լուսանկարը՝ panorama.am-ի