Ռուս-ադրբեջանական հարաբերություններում գլխավորն այն է, որ Ռուսաստանը ճանաչում է Ադրբեջանի տարածքային ամբողջականությունը, հայտարարել է ռուս քաղաքագետ, սոցիոլոգ, Միջազգային եվրասիական շարժման ղեկավար Ալեքսանդր Դուգինը, որն այցով գտնվում է Բաքվում: Այս մասին հաղորդում է Trend ադրբեջանական գործակալությունը:
«Ադրբեջանի տարածքային ամբողջականության ճանաչումը Ռուսաստանի կողմից շատ լուրջ է»,-ասել է նա:
Նրա խոսքով, եթե մոտ ժամանակներում հաջողվի պայմանավորվածություն ձեռք բերել, որ Արցախի 5 շրջանները տրվեն Ադրբեջանին, շատ կարևոր պահ կլինի ռուս-ադրբեջանական համագործակցությունում:
«Հետխորհրդային տարածքում տարածքային ամբողջականությունը կախված է Ռուսաստանից: Եթե հարաբերությունները լավ են, ապա տարածքային ամբողջականություն կա և այն ամուր է: Եթե հարաբերությունները վատ են, ապա այն այնքան է թուլանում, որ հեշտությամբ կարող է կորսվել», – ասել է Դուգինը:
Նրա խոսքով՝ ռուս-ադրբեջանական հարաբերությունները գտնվում են ամենաբարձր կետի վրա: Քաղաքագետը նաև նշել է, որ եթե Ռուսաստանը Հայաստանի դաշնակիցն է, չի նշանակում, որ Ադրբեջանի հակառակորդն է: «Ռուսաստանը հետապնդում է իր ազգային շահերը»,-հավելել է նա: