«Բարգավաճ Հայաստան» կուսակցության առաջնորդ, գործարար պատգամավոր Գագիկ Ծառուկյանն ապրիլի 24-ին լրագրողների հետ զրույցում հայտարարել է, որ իր ղեկավարած «Ծառուկյան» դաշինքը նորընտիր խորհրդարանում կլինի ընդդիմություն: «Հիմա տեսաք, որ ընդդիմություն ենք, ընդդիմությունը միայն ցեխ շպրտելը չի, այլ մարդիկ պետք է կարողանան գործ կատարել, որ մարդկանց կյանքում բան փոխվի, ձեր ցավը տանեմ, ձեր բնավորությանը թարգ տվեք: Եղբայր ջան, եթե կոալիցիա չենք, ինքնըստինքյան ընդդիմադիր ենք արդեն»,- հայտարարել է Գ. Ծառուկյանը։
Պատրա՞ստ են արդյոք ընդդիմադիր գործունեություն ծավալել «Ծառուկյան» դաշինքի ռեյտինգային թեկնածուները, որոնք ժամանակին ոչ պակաս եռանդով իշխանական գործունեություն էին ծավալում և տարբեր պաշտոններ զբաղեցնում՝ պարզ կդառնա առաջիկայում։
«Առաջին լրատվական»-ը թեմայի շուրջ զրուցել է Գյումրու նախկին քաղաքապետ, «Ծառուկյան» դաշինքի ռեյտինգային թեկնածու, Շիրակի մարզում քվեների թվով «Ծառուկյան» դաշինքից երկրորդ տեղը զբաղեցրած (12.485 ձայն) և հավանաբար առաջիկա խորհրդարանի պատգամավոր Վարդան Ղուկասյանի հետ։
– Պարոն Ղուկասյան, Գագիկ Ծառուկյանը հայտարարել է, որ «Ծառուկյան» դաշինքը խորհրդարանում ընդդիմություն է լինելու։ Պատրա՞ստ եք լինել ընդդիմադիր պատգամավոր։
– Ինքը հայտարարել է, ասել է՝ մենք էլ համամիտ ենք։ Մենք «Ծառուկյան» դաշինքի մեջ ենք, ո՞նց կարղ ենք ուրիշ բան մտածել։
– Կարող է Դուք ա՞յլ կարծիք ունեք և չեք ցանկանա ընդդիմադիր լինել մի ուժի, որի անդամն եք եղել երկար տարիներ։
– Աղջիկ ջան, նենց հարցեր եք տալիս, օրինակ՝ դու ընդդիմադի՞ր ես, ձեր կայքն ընդդիմադի՞ր է։
– ԶԼՄ-ները չեզոքություն են պահպանում, պարոն Ղուկասյան, լուսաբանում ենք և՛ ընդդիմությանը, և՛ իշխանությանը։
– Բայց դուք ընդդիմադի՞ր եք, դիմադի՞ր եք, այլընտրա՞նք եք։ Էսպես ասեմ՝ ով ինչ հայտարարել է, ճիշտ է արել։ «Ծառուկյան» դաշինքից պատգամավոր եմ ընտրվել ու էդպես էլ լինելու եմ։ Հիմա դուք ինձնից ի՞նչ եք ուզում։
– Ընդամենը հարցնում եմ՝ պատրա՞ստ եք ընդդիմադիր գործունեություն ծավալել խորհրդարանում։
– Միանշանակ։ Ես «Ծառուկյան» դաշինքից եմ։ Հեչ իմացե՞լ ես, որ ես մի կառույցի մեջ լինեմ ու ինձ թույլ տամ ուրիշ բաներ անել։ Ոնց որ ասեցին՝ այդպես էլ գնում ենք առաջ։
– Նոր Սահմանադրությամբ Ազգային ժողովի փոխնախագահի պաշտոնը ընդդիմությանն է վստահվելու՝ հավանաբար ձեր դաշինքից։ Կա՞ ինչ-որ մեկը, ում տեսնում եք այդ պաշտոնում։
– Ինչի ոչ որ, միանշանակ։ Ավելի բարձր պաշտոնների էլ կցանկանայի, որ մեր դաշինքից ինչ-որ մեկը լիներ։
– Կոնկրետ մեկին նկատի ունեմ՝ կա՞ այդպիսի մեկն այս պահի դրությամբ։
– Կոնկրետ անուն չեմ կարող ասել։ Երբ առիթը լինի, կասեմ՝ հիմա պատրաստ չեմ։
– Պարոն Ղուկասյան, Դուք հայտարարել էիք, որ Ձեզնից մոտ 3 հազար քվե են գողացել։ Ինչ-որ նորություն եղա՞վ, բացահայտեցի՞ք, թե ով է եղել գողացողը։
– Ի՞նչ պետք է լիներ որ։
– Գուցե բացահայտել եք։
– Չէ, թող մարդիկ ուրախանան։
– Բայց չասացիք՝ ձեր դաշինքի ներկայացուցիչնե՞րն էին գողացել, թե՞ ՀՀԿ-ի։
– Հանգիստ մնա։ Ես որ ինչ-որ բան ասել եմ՝ օդի մեջ չեմ ասել, բոլորն էլ լավ գիտեն։
– Հանրությունն էլ է ուզում իմանալ՝ ով է եղել գողը։
– Հանրությունն էլ գիտի՝ ուղղակի և անուղղակի։ Հանրությունն ավելի լավ գիտի։
– Ոչ ոք չգիտի։
– Գիտի, դու էլ լավ գիտես։
– Ես չգիտեմ և հարցնում եմ՝ «Ծառուկյան» դաշինքի՞ց է եղել, թե՞ ՀՀԿ-ից։
– Լավ էլ գիտես։
