Երկարատև քննարկումներից հետո հայտնի դարձավ, որ ՀԱՊԿ գլավոր քարտուղարի պաշտոնը վերջապես Հայաստանի ներկայացուցիչն է ստանձնելու: «Առաջին լրատվական»- ի հետ զրույցում անդրադառնալով հարցին, թե Յուրա Խաչատուրովի նշանակումը ինչ կարող է տալ Հայաստանին, Գլոբալիզացիայի և տարածաշրջանային համագործակցության կենտրոնի ղեկավար Ստեփան Գրիգորյանը նշեց, որ դրական է գնահատում Խաչատուրովի նշանակումը: Նրա խոսքով՝ դա վկայում է այն մասին, որ այնուամենայնիվ, հարգում են Հայաստանին. «Հայաստանի խոսքն անցնում է»:
«Գլխավոր քարտուղարի պաշտոն կա նաև ՆԱՏՕ-ում, այդ բոլոր միջազգային կառույցները նմանատիպ են, ՀԱՊԿ-ը փոքր կազմակերպություն է՝ 6 անդամ ունի, իսկ ՆԱՏՕ-ում 28 անդամ են, բայց կառուցվածքային առումով շատ նման են. գլխավոր քարտուղարի դերը ոչ թե քաղաքական որոշում կայացնելն է, այլ պետությունների միջև համագործակցությունը կարգավորելը և տեխնիկական համագործակցությունն ապահովելը: Գլխավոր քարտուղարն, օրինակ, նախապատրաստում է գագաթաժողովները, պաշտպանության նախարարների, արտգործնախարարների հանդիպումները, ամփոփում է ինֆորմացիան, ներկայացնում է բոլոր նախագահներին: ՀԱՊԿ գլխավոր քարտուղարի գործառույթը քաղաքական որոշումներ կայացնողի գործառույթ չէ, ՀԱՊԿ գլխավոր քաղաքական մարմինը 6 անդամ պետությունների նախագահների խորհուրդն է, որը, հիմնվելով ինֆորմացիայի վրա, որոշում է կայացնում»,- նշեց Ս. Գրիգորյանը:
Քաղաքագետն ընդգծեց, որ ՀԱՊԿ գլխավոր քարտուղարից չպետք է ակնկալել, որ նա Հայաստանի շահերը առաջ է տանելու, քանի որ դա իր գործառույթի մեջ չի մտնում: Նրա խոսքով՝ Խաչատուրովը, որպես ՀԱՊԿ գլխավոր քարտուղար, պետք է ներկայացնի այդ կազմակերպության շահերը:
«Այնուամենայնիվ դրական է այն, որ ՀԱՊԿ-ում սկսեց աշխատել ռոտացիոն սկզբունքը, որը կանոնադրությունում ֆիքսված էր, բայց բոլորը լռությամբ ընդունում էին, որ Ռուսաստանի դերն այնքան մեծ է, որ միշտ ՀԱՊԿ գլխավոր քարտուղարը պետք է լինի Ռուսաստանի ներկայացուցիչը:
Ի վերջո Ռուսաստանը հասկացավ, որ սխալ է այն, որ 94թ-ից սկսած՝ անընդհատ ՀԱՊԿ ղեկավարը Ռուսաստանի ներկայացուցիչն է, հասկացավ, որ պետք է ռոտացիոն սկզբունքն աշխատի, և քանի որ Հայաստանն առաջինն էր այդ հերթում, գրեթե ավտոմատ կերպով հենց Հայաստանի ներկայացուցիչը նշանակվեց: Դրական է այն, որ ի վերջո հարգեցին կանոնադրությունը, հարգեցին մեր իրավունքները և Հայաստանի ներկայացուցչին նշանակեցին ՀԱՊԿ գլխավոր քարտուղար»,- նշեց Ս. Գրիգորյանը:
Նրա դիտարկմամբ՝ Խաչատուրովը Մոսկվային ձեռնտու տարբերակ էր. «Բայց հուսով եմ, որ նա չի մոռանա, որ հայ է, Հայաստանի քաղաքացի է և որ երկար ժամանակ այստեղ պաշտոններ է զբաղեցրել: Խաչատուրովը թեև քաղաքական որոշումներ չի կարող կայացնել, բայց նա մեր տարածաշրջանի վտանգներն ավելի լավ է հասկանում, և եթե, Աստված չանի, նորից Ադրբեջանի կողմից հարձակում լինի Հայաստանի վրա, նա գոնե ժամանակին ինֆորմացիան կհասցնի բոլոր նախագահներին, օբյեկտիվ ինֆորմացիա հասցնելը կարևոր է»:
Մանրամասները՝ տեսանյութում:
