Ապրիլի 20-ին Երևանում տեղի կունենա «Ազգ-բանակ-2017» թեմայով համաժողով, որ պաշտպանության նախարարությունը կազմակերպում է կրթության ու գիտության նախարարության հետ միասին:
Համաժողովը կտևի մի քանի օր՝ տարբեր միջոցառումների տեսքով, և դրանում ներգրավված կլինի գրեթե ամբողջ կրթական համակարգը: Թե ինչ է կրթական համակարգը՝ գոնե այս պահին բոլորն են հասկանում, քանի որ շատ թարմ է այդ համակարգի հետ կապված ձայնագրությունների նախընտրական սկանդալը, որը նաև վերածվել է դատական գործընթացի՝ իհարկե, ձայնագրություններն անող կողմի դեմ: Կրթության ու գիտության համակարգը վարչական ծանրակշիռ ռեսուրս է, թերևս հիմնական ռեսուրսը:
Ինչ է ազգ-բանակ հայեցակարգը՝ ևս պարզ է. դա Վիգեն Սարգսյանի ակտիվ քաղաքականություն մուտքի, այսպես ասած, բազային-գաղափարական հիմքն է, ընդ որում, մի շարք իրողություններից ելնելով՝ օբյեկտիվորեն բավական ծանրակշիռ հիմքը: Հարցն այն է, թե որքանով է այն ծառայելու պետության օբյեկտիվ շահերին, թե՞ հանդիսանալու է քաղաքական սուբյեկտիվ շահերի սպասարկման միջոց:
Բանն այն է, որ խորհրդարանի ընտրությունից հետո Հայաստանում ներիշխանական դիմակայությունն ու պայքարը մտնում են, այսպես ասած, վճռական փուլ, որտեղ պետք է հանգուցալուծվի Սերժ Սարգսյանի նախագահական պաշտոնից հետո վարչապետի պաշտոնի խնդիրը: Վիգեն Սարգսյանը այդ հարցում Սերժ Սարգսյանի ֆավորիտներից մեկն է, ակնհայտորեն: Եվ եթե Սերժ Սարգսյանն ինքը չցանկանա կամ չկարողանա առաջադրվել որպես վարչապետ, ապա այդ պաշտոնում նա անկասկած կցանկանա տեսնել հենց Վիգեն Սարգսյանին, ոչ թե Կարեն Կարապետյանին: Բայց դրա համար պետք է, որպեսզի Վիգեն Սարգսյանը լինի ավելին, քան լոկ պաշտպանության նախարար: Եվ Վիգեն Սարգսյանն ակնհայտորեն հավակնում է լինել ավելին, քանի որ հանդես է եկել նաև տնտեսական բնույթի հայեցակարգային դատողություններով:
Ազգ-բանակն էլ այն հիմքն է, որ Սարգսյանին, այսպես ասած, տալիս է տարբեր ոլորտներ «մուտքի» լեգիտիմ հնարավորություն: Վիգեն Սարգսյանը սկսում է կրթության ու գիտության ոլորտից: Ընդ որում, հետաքրքրական է, որ ոլորտը պատկանում է Դաշնակցությանը, այսինքն՝ կոալիցիոն պայմանավորվածությամբ այն ՀՅԴ ներկայացուցչի պորտֆել է: Դա հատկապես ուշագրավ է՝ նկատի ունենալով վարչապետ Կարեն Կարապետյանի ոչ բարվոք հարաբերությունը ՀՅԴ-ի հետ, ՀՀԿ-ՀՅԴ կոալիցիայից նրա դժգոհությունը:
Լուսանկարը՝ armeniasputnik.am-ի