Գերմանիայի կանցլեր Անգելա Մերկելը նվազագույնը երկու անգամ հանդիպել է երեք բրիտանական հատուկ ծառայությունների ղեկավարների հետ, որոնք նրան տեղեկացրել են Գերմանիայում և Եվրոպայում ահաբեկչական սպառնալիքների մասին: Տեղեկատվության դիմաց կանցլերը բրիտանական հատուկ ծառայություններին փոխանցել է ՌԴ նախագահ Վլադիմիր Պուտինի վերաբերյալ դոսյե՝ գրում է Focus գերմանական պարբերականը:
Պարբերականի տվյալներով՝ գաղտնի հանդիպումներում մասնակցել է Մեծ Բրիտանիայի կառավարական կապի կենտրոնի ղեկավարը, որը կանգնած է երկրում անօրինական մի շարք գաղտնալսումների հետևում: Մերկելի վերջին հանդիպումը բրիտանական գաղտնի ծառայությունների ղեկավարության հետ կայացել է 2015թ. հոկտեմբերին Մեծ Բրիտանիայի այդ ժամանակվա վարչապետ Դևիդ Քեմերոնի քաղաքից դուրս գտնվող նստավայրում:
Մերկելի գաղտնի բրիֆինգները լուրջ քննադատության են ենթարկվել անվտանգության ոլորտի գերմանացի փորձագետների կողմից: Ի նշան երախտագիտության՝ Մերկելը բրիտանացիներին է փոխանցել Պուտինի մասին դոսյե, ինչպես նաև Գերմանիայի Հետախուզական դաշնային ծառայության պատրաստած նյութերը՝ Ղրիմի շուրջ ստեղծված իրավիճակի վերաբերյալ: Ինչպես հաղորդում է Focus-ը, բրիտանական կողմը, զարմացել է՝ իմանալով, որ գերմանական հատուկ ծառայությունները նախօրոք տեղեկացված չեն եղել Մերկելի հանդիպումների մասին:
