Սիրիայի օբյեկտների վրա ԱՄՆ-ի հարձակումն ագրեսիա է և վնասում է ռուս-ամերիկյան հարաբերություններին, ինչպես նաև ահաբեկչության դեմ ընդհանուր պայքարին: Ինչպես հաղորդում է Interfax գործակալությունը, նման կարծիք է հայտնել ՌԴ նախագահ Վլադիմիր Պուտինը, որի խոսքերը մեջբերել է նրա մամուլի խոսնակ Դմիտրի Պեսկովը:
«Նախագահ Պուտինն ամերիկյան հարվածները որակում է որպես ագրեսիա Սիրիայի ինքնիշխան պետության դեմ, որը խախտում է միջազգային իրավունքի նորմերը»,-ասել է Պեսկովը:
Պեսկովը նաև նշել է, որ Պուտինի կարծիքով՝ ԱՄՆ-ը Սիրիան հրթիռակոծել է անհիմն պատրվակով, քանի որ սիրիական բանակը քիմիական զենք չունի:
Ավելի վաղ հաղորդել էինք այն մասին, որ ԱՄՆ-ը թևավոր հրթիռներ է արձակել Սիրիայի ուղղությամբ՝ ի պատասխան օրեր առաջ Իդլիբում ավիահարձակման, որի ժամանակ, ըստ ամենայնի, քիմիական զենք է կիրառվել: ԱՄՆ-ը կատարվածի համար մեղադրում է Դամասկոսին:
