USA Today-ը գրում է, որ ԱՄՆ նախագահ Դոնալդ Թրամփն ու նրա ընկերությունը կապված են եղել նախկին խորհրդային հանրապետությունների 10 գործարարների հետ, ովքեր առնչություն են ունեցել քրեական կառույցների կամ փողերի լվացման հետ։
Թրամփը, նրա ընկերությունն ու գործընկերները բազմիցս դիմել են ունևոր ռուսներին և նախկին խորհրդային հանրապետությունների օլիգարխներին, որոնցից մի քանիսը կապեր են ունեցել կազմակերպված հանցավորության հետ։ Պարբերականը հիմնվում է դատական նյութերի, կառավարական և իրավական փաստաթղթերի և նախկին դաշնային դատախազ Քեն Մաքքալիոնի հետ հարցազրույցի վրա։
Այդ գործարարների թվում է եղել, մասնավորապես, ռուս էմիգրանտ Ֆելիքս Սատերը, ով աջակցություն է ցուցաբերել Նյու Յորքում Trump SoHo հյուրանոցի կառուցմանը։ Նա կրկնակի դատապարտված է եղել, իսկ այնուհետև Ռուսաստանում Թրամփի համար ներդրողներ փնտրելով է զբաղվել։ Նրա դեմ մեղադրանքներ էին առաջադրվել դեռևս 1998 թվականին, սակայն ամենը քողարկվել է, քանի որ արդյունքում նա սկսել է ինֆորմատոր աշխատել ԿՀՎ-ի համար, ինչը, ինչպես թերթն է հաստատում, ապացուցում են բազմաթիվ հաշվետվություններ։
Trump SoHo նախագծով Թրամփի այլ գործընկեր՝ ղազախ միլիարդատեր Ալեքսանդր Մաշկևիչին Բելգիայի իշխանությունները 55 մլն դոլարի լվացման սխեմային մասնակցություն ունենալու մեղադրանք էին առաջադրել, սակայն ավելի ուշ դրանք հանվել են։ Պարբերականի վարկածով՝ Մաշկևիչի գումարներով է Trump SoHo-ի շինարարությունը մասամբ իրականացվել։
Պարբերականի վարկածով՝ Թրամփի ևս երեք գործընկերների դեմ, որոնց պատկանել է Trump SoHo-ի անշարժ գույքը Ֆլորիդա և Նյու Յորք նահանգներում (Անատոլի Գոլուբչիկ, Վադիմ Տրինչեր և Միխայիլ Սոլ) առաջադրվել էր ռուս-ամերիկյան հանցավոր խմբին մասնակցություն ունենալու և ի շահ Ռուսաստանում գտնվող միջազգային քրեական հեղինակության գործունեություն իրականացնելու մեղադանքներ․ նրանք ղեկավարել են ազարտային խաղերի մի շարք անօրինական կայքեր։
Ինչպես հաստատում է USA Today-ը՝ Թրամփն աշխատել է նաև Ղազախստանի էներգետիկայի նախկին նախարար և Ալմաթիի քաղաքապետ Վիկտոր Խրապունովի հետ, որի դեմ Լոս Անջելեսում առաջադրվել էին միլիոնավոր դոլարների քողարման մեղադրանքներ։ Նշվում է, որ դրանք գողացվել էին քաղաքից և այնուհետև ներդրվել Trump SoHo հյուրանոցում։ Այժմ նա բնակվում է Շվեյցարիայում։
Ֆլորիդայում Թրամփի ընկերության աշարժ գույքի մեկ այլ սեփականատեր է եղել ուկրաինացի գործարար Պյոտր Կիրիչենկոն, ով ներգրավված է եղել գումարի լվացման սխեմայում, որին մասնակցություն է ունեցել նաև Ուկրաինայի նախկին վարչապետ Պավել Լազարենկոն։
