Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվում է քննվել «Վելես» հասարակական կազմակերպության նախագահ Մարինա Պողոսյանի դեմ հարուցված քրեական գործը: Դատարանում հրապարակվել են գործի նյութերը, որոնց մեջ է նաև Պողոսյանի՝ «Առաջին լրատվական»-ին տված «Վաշխառուները քաղաքացիներին դրդում են ինքնասպանության» վերտառությամբ հարցազրույցը:
Սա մի շարք հարցեր է առաջացնում, գուցե նաև տալիս է որոշ հարցերի պատասխաններ: Ի՞նչ կապ ունի «Վելես» ՀԿ-ի նախագահի հարցազրույցը իր դեմ հարուցված քրեական գործի հետ: Նախ համառոտ ներկայացնենք, թե ինչ է ասել Մարինա Պողոսյանը վերոնշյալ հարցազրույցում: Առաջին իսկ նախադասությունում նա մեղադրում է իրավապահ համակարգին կոռուպցիայի մեջ, պաշտոնյաներին՝ անտարբերության, ամենաթողության և անգրագիտության մեջ: Պողոսյանը նշում է, որ իրավապահները խաղում են մարդկանց ճակատագրերի հետ՝ տարատեսակ պատվերների շրջանակներում: «Իմ բոլոր ասածները կարող եմ հատ-հատ ապացուցել փաստաթղթերով, միայն թե մեր ոստիկանությունը, դատախազությունն ու դատական համակարգը անտեսում են այդ փաստերը»,- ասել էր իրավապաշտպանը:
Այժմ փորձենք հասկանալ, թե նախաքննական մարմինը ինչու էր այս հարցազրույցը կցել քրեական գործի նյութերին՝ այն դեպքում, որ Պողոսյանի դեմ հարուցվել էր քրեական գործ՝ անշարժ գույքի հափշտակության մեղադրանքով: 2014 թվականին տված հարցազրույցում Պողոսյանը հանդես է գալիս որպես իրավապաշտպան, ով պայքարում է կոռուպցիայի և ապօրինությունների դեմ: Իսկ 2015 թվականին նրա դեմ հարուցված քրեական գործը վերաբերում է կանադահայ Արփի Մերասի բնակարանի շուրջ ծագած վեճին: Այսինքն՝ նրա տված հարցազրույցը չէր կարող որևէ ապացուցողական նշանակություն ունենալ այդ քրեական գործի համար:
Դատարանում մեղադրող դատախազ Էդգար Պետրոսյանը չբացատրեց, թե հարցազրույցն ինչպես է հայտնվել քրեական գործի նյութերում: Նրա փոխարեն Արփի Մերասի ներկայացուցիչ, փաստաբան Հրանտ Անանյանը փորձեց պարզաբանել՝ ասելով, որ իր կարծիքով՝ անձի նույնականացման համար է հարցազրույցը կցվել գործին: Դատավոր Մնացական Մարտիրոսյանը պարզաբանեց, որ անձի նույնականացման համար գոյություն ունեն անձնագիր և այլ փաստաթղթեր:
Եվ իրականում հայաստանյան պրակտիկայում դժվար է գտնել որևէ քրեական գործ, որի շրջանակներում անձի նույնականացման նպատակով օգտագործվեն մամուլում տված նրա հարցազրույցները: Մարինա Պողոսյանն այսպես է մեկնաբանում կատարվածը. «Այդ հարցազրույցում ես մեղադրում եմ բոլորին՝ քննիչներ, դատախազներ, դատավորներ: Մենք նաև բազմաթիվ բաց նամակներ ենք հղել՝ հայտարարելով, որ դատախազությունը հովանավորում է վաշխառուներին: Հասկանալի է, որ նման հանրային մեղադրանքներից հետո ես բազմաթիվ թշնամիներ եմ վաստակել այդ ոլորտում, և այս քրեական գործը լավ առիթ է եղել նրանց համար ինձ հետ հաշվեհարդար տեսնելու: Եթե Արփի Մերասը իսկապես ինձ հետ գույքային վեճ ունենար, ապա այն կարող էր լուծել քաղաքացիական դատարանում, ինչպես օրենքն է պահանջում, սակայն ես գնալով համոզվում եմ, որ տարեց կնոջն օգտագործում են իմ դեմ քրեական հետապնդումներ իրականացնելու նպատակով»,- «Առաջին լրատվական»-ի հետ զրույցում ասաց Մարինա Պողոսյանը:
Ինչ վերաբերում է հարցազրույցի միջոցով անձի նույնականացմանը, ապա Պողոսյանը կատակելով նշեց. «Եթե անձանց «Առաջին լրատվական»-ին տված հարցազրույցով են նույնականացնում, ապա այս ընտրություններին կարող են մասնակցել միայն նրանք, ովքեր մինչև ապրիլի 2-ը հասցրել են հարցազրույց տալ ձեզ»:
Նշենք, որ մեղադրող դատախազ Էդգար Պետրոսյանը և գործով տուժող Արփի Մերասը նախորդ նիստերի ժամանակ չեն պատասխանել լրագրողների հարցերին: Դատախազը պատճառաբանել էր, թե չի ցանկանում նախաքննական գաղտնիք հրապարակել, իսկ Արփի Մերասին փաստաբան Անանյանն էր խորհուրդ տվել լռել:
Մարինա Պողոսյանի գործով հաջորդ դատական նիստը նշանակված է մարտի 28-ին, ժամը 10:00-ին:
Լուսանկարը՝ Photolure-ի
