«Առաջին լրատվական»- ի զրուցակիցն է ՄԱՀՀԻ-ի փորձագետ, քաղաքագետ Ռուբեն Մեհրաբյանը:
-Օրերս հայտնի դարձավ, որ Ուկրաինայում սպանվել է ՌԴ Պետդումայի նախկին պատգամավոր Դենիս Վորոնենկովը, Ռուսաստանում նրա նկատմամբ հետախուզում էր հայտարարված: Նա Ուկրաինայի նախկին իշխանություններին՝ մասնավորապես Յանուկովիչին մեղադրում էր պետական դավաճանության մեջ: Քննադատներին զսպելու՝ Ռուսաստանի այս քաղաքականությունն ի՞նչ հնարավոր հակազդեցություն կարող է ունենալ հետագայում և ի՞նչ նախադեպեր կարող է ստեղծել:
-Այն, ինչ տեղի ունեցավ Կիևում, դա ցուցադրական, մաֆիոզ սպանություն էր, և այն մեղադրանքները, որոնք ուղղվեցին Ուկրաինայի կողմից՝ հանձին նրա նախագահի, որ սա պետական ահաբեկչության ակտ է, այնքան էլ անհիմն չեն: Այդ հայտարարությունն արվեց բառացիորեն դեպքից ժամեր անց: Ուշագրավ է, որ սպանողը մահացավ հիվանդանոցում, և այդ անձի մոտ հայտնաբերվել էր Ուկրաինայի Ազգային գվարդիայի վկայական,և Գլխավոր դատախազն էլ զարմանք հայտնեց, որ իր պրակտիկայում դեռ չի հանդիպել նման բան, որ մարդը գնա սպանության՝ անձը հաստատող փաստաթուղթը գրպանում: Սա հարցեր է առաջացնում: Այս ամենը տեղավորվում է այն միտման մեջ, որը տեսնում ենք այս նորագույն ժամանակներում, Լիտվինենկոյի պոլոնիումով թունավորումից, Բորիս Նեմցովի սպանությունից, Բերեզովսկու մահվանից սկսած: Մի շարք բալկանյան երկրներում տեռորիստական խմբեր էին նախապատրաստում, որոնք պետք է ֆիզիկական հաշվեհարդար տեսնեին գործող իշխանությունների նկատմամբ և դրանով իսկ կասեցնեին այդ երկրների ընթացքը դեպի ՆԱՏՕ և ԵՄ: Այսինքն՝ այս ամեն ինչը տեղավորվում է այդ տրամաբանության մեջ:
Ինչ հակազդեցություն կարող է առաջացնել. կարծում եմ, որ Պուտինը և իր նախկին հիմնարկը և իր շրջապատը վաղուց են քաղաքական խնդրից վերածվել քրեաքաղաքական խնդրի: Այնուամենայնիվ, հաշվի առնելով նաև, որ այդ ամենը սերտորեն կապված է միջազգային կազմակերպված հանցավորության հետ և նաև միջազգային կոռուպցիոն ցանցերի հետ, որտեղ տասնյակ միլիարդների շրջանառություն կա, սա դարձել է լրջագույն խնդիր, եվրոպական անվտանգության թիվ մեկ սպառնալիք: Եվ հատկապես երբ այս ամենը սկսում է ձեռք բերել նման թիրախավորված և արյունալի դրսևորումներ, ապա արդեն պետք են հստակ հակամաֆիոզ, հակակրիմինալ գործողություններ՝ սկսած օրենսդրական մակարդակից, վերջացրած օպերատիվ և այլ միջոցներով:
Հարցազրույցն ամբողջությամբ՝ տեսանյութում:
