Սերժ Սարգսյանն իսպանական EFE գործակալությանը տված հարցազրույցում անդրադառնալով 2018 թվականի խնդրին՝ հայտարարել է, թե «գծած որևէ պլան չկա»: Այսօրինակ տրամաբանությամբ հայտարարությունը նրա համար արդեն դառնում է սովորական, քանի որ Սարգսյանը հերթական անգամ բաց է թողնում 2018-ի խնդիրը: Բանն այստեղ խնդիրը չէ ընդհանրապես, այլ դրանում իր դերը:
Սարգսյանը չի հայտարարում, որ ունի իշխանությունը թողնելու որոշում: Ի վերջո, այդ որոշումը անմիջականորեն կապված չէ որևէ պլանի հետ: Պլան կարող է չլինել, բայց լինել որոշում, որ ինչ պլան էլ ձևավորվի՝ ինքը չի լինի դրանում: Ընդ որում, Սերժ Սարգսյանին հարցերն ուղղվում են հենց իր որոշման, իր ճակատագրի վերաբերյալ ծրագրերի պրիզմայով: Եվ երբ հայտարարվում է, որ գծած պլան չկա, ապա դա ըստ էության նշանակում է, որ պլանները իրականում բազմաթիվ են, և ընթացքը կորոշվի ըստ իրավիճակի:
Միևնույն ժամանակ հստակ է դառնում, որ եթե պլան չկա, ուրեմն չկա նաև 2018-ից հետո Կարեն Կարապետյանին վարչապետի պաշտոնում տեսնելու պլան, կամ դա ընդամենը այդ պաշտոնի հետ կապված բազմաթիվ պլաններից մեկն է: Այսպես թե այնպես, գծած պլանի բացակայության մասին Սերժ Սարգսյանի հայտարարությունն ըստ էության նշանակում է, որ Կարեն Կարապետյանը ժամանակավոր վարչապետ է:
Սերժ Սարգսյանը հայտարարում է, որ 2017 թվականի ընտրություններում մեծամասնություն լինելու դեպքում Կարապետյանն է լինելու վարչապետ, իսկ ահա 2018-ի համար գծած պլան չկա: Դա նշանակում է, որ 2018-ին Կարեն Կարապետյանը չի լինելու վարչապետ, և Սերժ Սարգսյանը նմանօրինակ ակնարկ գործնականում անում է առաջին անգամ՝ շեշտադրման իմաստով: Սա, իհարկե, ոչինչ միարժեք չի կարող նշանակել, և ի վերջո՝ գուցե Սարգսյանն ընդամենը փորձում է իշխանության մեջ պահել, այսպես ասած, մրցակցային տրամադրությունը, մոտիվացիոն հիմքերը, հատկապես նախընտրական իրավիճակում:
Այս առումով, իհարկե, շատ ավելի հետաքրքիր է, թե Սարգսյանը 2018-ի մասին ինչ դիրքորոշում կարտահայտի արդեն 2017 թվականից հետո, երբ պարզ լինի խորհրդարանական ընտրության արդյունքը, և իշխանությունը կարողանա անցկացնել այն «լավագույն», այսինքն՝ վերարտադրության իմաստով անաղմուկ ընտրությունը, որ միջազգային հանրությանը խոստացել է Սերժ Սարգսյանը:
Գրեթե կասկած չկա, որ դրանից հետո արդեն Սերժ Սարգսյանի դիրքորոշումներում և հրապարակային արտահայտություններում էապես կբարձրանա «որոշակիության» և կոնկրետության աստիճանը՝ կապված 2018-ի հետ: Չի բացառվում, որ կպարզվի նաև ոչ միայն գծած պլանի, այլև պարզապես իրականացվող պլանի առկայությունը: Հարցն այն կլինի, թե որտեղ է լինելու այդ պլանի գլուխը:
Լուսանկարը՝ Getty Images-ի
