Մասիսում տեղի է ունեցել միջադեպ ՀՀԿ-ական երկու թեկնածուների խմբերի՝ Մուրադ Մուրադյանի և Արայիկ Գրիգորյանի միջև, որը Արարատի նորանշանակ մարզպետ Արամայիս Գրիգորյանի եղբայրն է: Միջադեպի պատճառն, ըստ մամուլի, այն է, որ Մուրադյանի թիմակիցներից ոմանք անցել են Գրիգորյանի կողմը և որոշել են աշխատել նրա օգտին: Միջադեպին միջամտել է ոստիկանությունը:
Սա այն է, ինչի մասին կանխատեսումներ արվում էին, այսպես կոչված, ռեյտինգային ընտրակարգի ներդրման կապակցությամբ, որի պարագայում ՀՀԿ-ական մի քանի թեկնածուներ միևնույն ընտրատարածքում պայքարելու են միմյանց դեմ՝ ձայն հավաքելու և պատգամավորական մանդատ ստանալու համար: Միևնույն ընտրատարածքում միմյանց դեմ առաջադրվել են ՀՀԿ-ի տարբեր, այսպես կոչված, օդիոզ դեմքեր, որոնք համամասնական ցուցակում չկան, և խորհրդարանում հայտնվելու միակ տարբերակը մնում է ռեյտինգային կարգով շատ ձայն հավաքելը:
Այսպիսով՝ Մասիսի միջադեպը կարող է համարվել ներհանրապետական, այսինքն՝ ներկուսակցական նախընտրական թոհուբոհի ձնծաղիկը: Հարցը, սակայն, այն է, թե արդյոք հետագայում կլինե՞ն այլ ծաղիկներ՝ թե Մասիսում, թե ընդհանրապես այլ ընտրատարածքներում, որտեղ ՀՀԿ մի քանի թեկնածուներ կլինեն միմյանց դեմ:
Մի քանի օր առաջ էլ մամուլում տեղեկություն էր հայտնվել այն մասին, որ միմյանց հետ քեֆից հետո իրար են սկսել ծեծել Տարոն Մարգարյանի աներորդու՝ Ռոբերտ Սարգսյանի թիմակիցները, որոնց քեֆի սեղանի շուրջ է հավաքել Տարոն Մարգարյանի օգնական Արայիկ Քոթանջյանը, որպեսզի սեղանի շուրջ քննարկեն նաև նախընտրական անելիքները: Իսկ Ռոբերտ Սարգսյանը կամ, որ նույնն է, Տարոն Մարգարյանը ունի ուժեղ մրցակից՝ ի դեմս ԴԱՀԿ նախկին պետ և Սերժ Սարգսյանի մանկության ընկերոջ քրոջորդի Միհրան Պողոսյանի: Այստեղ փաստորեն միջադեպը գրանցվել է միևնույն թիմի շրջանակում, ինչը, սակայն, էլ ավելի է ընդգծում լարվածությունը ՀՀԿ ներքին շրջանակներում, որն այնքան մեծ է, որ նույնիսկ միևնույն թիմում ամեն մի սխալը կամ չհասկացվածությունը կարող է դառնալ նման բախումների առարկա:
Այլ կերպ ասած՝ ՀՀԿ-ն ըստ էության նյարդերի վրա է, և այստեղ, իհարկե, հարց է, թե արդյո՞ք Սերժ Սարգսյանը կկարողանա ընտրական շրջանում իրավիճակին տիրապետել այնպես, որ նման միջադեպերը չկրեն պարբերական և ինտենսիվ բնույթ՝ այսպես ասած, խառնելով անաղմուկ ընտրության նրա պլանները: Մյուս կողմից, սակայն, միգուցե հենց այս տարբերակն էլ անաղմուկ ընտրության գրավականներից մեկն է, և Սերժ Սարգսյանը հենց այս մոդելի միջոցով է փորձում ապահովել իր հռչակած լավագույն ընտրությունները:
Բանն այն է, որ երբ միջադեպերը լինում են ՀՀԿ տարբեր օդիոզ դեմքերի միջև, սա, իհարկե, լավագույն տարբերակն է, և ըստ ամենայնի ՀՀԿ-ին հասարակության դեմ դուրս գալուց, հասարակության հետ միջադեպերից զերծ պահելու տարբերակը Սերժ Սարգսյանը գտել է միմյանց հետ բախման տանելու միջոցով՝ համարելով, որ ՀՀԿ օդիոզ շրջանակներին միայն այդ կերպ է հնարավոր շեղել հասարակությունից: Իսկ հասարակությունն էլ երևի թե առանձնապես չի մտահոգվի, երբ ՀՀԿ այդ շրջանակները փորձեն միմյանց միջև հարաբերություններ պարզել: Հասարակությունն էլ անկասկած դա կհամարի լավագույն տարբերակը, գոնե առայժմ, երբ գործնականում կարծես թե չկան առանձնապես կենսունակ այլ տարբերակներ:
Լուսանկարը՝ Getty Images-ի