ՌԴ Պետդումայի պատգամավոր, ԱՊՀ երկրների ինստիտուտի տնօրեն Կոնստանտին Զատուլինի հայտարարությունը, թե Եվրասիական տնտեսական միության (ԵԱՏՄ) երկրների քաղաքացիները երկրորդ ընդհանուր քաղաքացիություն պիտի ունենան, զուտ քարոզչական քայլ է, որի պատճառը այս կառույցում առաջացած որոշակի ճգնաժամն է: «Առաջին լրատվական»-ի հետ զրույցում նման կարծիք հայտնեց Պրահայի «Ազատություն» ռադիոկայանի «Էխո Կավկազա» ծառայության քաղաքական մեկնաբան Վադիմ Դուբնովը:
Զատուլինը ասել էր, որ այդ գաղափարի իրականացմանը խոչընդոտում են ոչ միայն ներքին վեճերը, այլև անդամ պետությունների անհամաձայնությունը:
«Եթե, օրինակ, Հայաստանը կողմ է դրան, ապա մյուսները, օրինակ՝ Բելառուսը և Ղազախստանը, չեն ցանկանում»,- ասել էր Զատուլինը:
Վադիմ Դուբնովն իր հերթին ասում է, որ Հայաստանի իշխանությունները համաձայն կլինեն ցանկացած առաջարկի, որը կարվի Մոսկվայի կողմից, բայց խնդիրն այն է, որ սա մեռելածին գաղափար է: Իսկ Զատուլինն այն գործիչներից է Ռուսաստանում, որի միջոցով կարելի է փորձարկել ցանկացած գաղափար:
«Երկու հարթություն կա այս համատեքստում: Հարթություններից մեկը վերաբերում է բացառապես Զատուլինի անձին: Պարզապես կան մարդիկ, որոնց վրա կարելի է փորձարկել ինչ-որ գաղափար: Զատուլինը պատկանում է նմանատիպ մարդկանց թվին: Եվրասիական, հետխորհրդային ինտեգրացիայի փորձագետ Զատուլինի հեղինակությանը, ըստ էության, ոչինչ չի սպառնում, ուստի նա կարող է խոսել բավական ազատ, անկաշկանդ և ստեղծագործել ցանկացած ցնորամիտ թեմայով: Հնարավոր է՝ կան ինչ-որ աշխատանքներ այդ ուղղությամբ, և Զատուլինին վստահել են այդ հարցը բարձրաձայնելը:
Կարծում եմ՝ դա մեռելածին գաղափար է, քանի որ ֆորմալ տեսանկյունից բացարձակապես անհասկանալի է, թե ինչպես կարող է լինել երկրորդ քաղաքացիություն, որովհետև երկրորդ քաղաքացիությունը պետական կազմավորմանը հատուկ մի բան է: Իսկ այն միավորումը, որի մասին խոսում է Զատուլինը, ոչ թե պետականություն, այլ նույնիսկ կանխատեսելի սահմաններ չունի, և պարզ չէ, թե ինչ պարագծով կանցնի այդ համընդհանուր երջանկությունը»,- նշեց մեր զրուցակիցը:
Դուբնովը համոզված է, որ Ղազախստանին ու Բելառուսին այս նախաձեռնությունը հաստատ չի ուրախացնի:
Իսկ Հայաստանը, փաստորեն, կո՞ղմ կլինի՝ հարցին փորձագետը պատասխանեց. «Մենք, իհարկե, խոսում ենք Հայաստանի իշխանության մասին: Հայաստանի իշխանությունը համաձայն կլինի իրադարձությունների զարգացման ցանկացած ընթացքի հետ: Եթե զարգացումը գնա ընդհանուր քաղաքացիություն մտցնելու ուղղությամբ, ապա նա կողմ կլինի ընդհանուր քաղաքացիություն մտցնելուն, եթե չստացվի, ապա նա օբյեկտիվորեն կհամակերպվի այն փաստի հետ, որ չստացվեց: Հայաստանը այդ առումով շատ հարմար գործընկեր է»:
