«Առաջին լրատվական»-ի զրուցակիցն է ՀՀԿ պատգամավոր, «ՀՀ Աֆղանստանի պատերազմի վետերանների միության» նախագահ Արմեն Մխիթարյանը, ով առաջիկա խորհրդարանական ընտրություններում չի առաջադրվել ոչ ռեյտինգային ընտրակարգով, ոչ էլ ընդգրկված է ՀՀԿ համամասնական ցուցակում։
– Պարոն Մխիթարյան, ինչո՞ւ ՀՀԿ-ն որոշեց Ձեզ դուրս թողնել նոր խորհրդարանից։
– Դա իմ որոշումն է եղել։ Ես եմ խնդրել մեր կուսակցության ղեկավարին, որ իմ անունը չգրեն ցուցակներում։
– Ինչո՞ւ, որովհետև արդյունավետ չէ՞ր Ձեր աշխատանքը խորհրդարանում։
– Դե չէ։ Ուղղակի հարմար եմ գտել, որ ես չլինեմ։ Չեմ ցանկանում։ Ուղղակի դա է իմ ցանկությունը, եթե ուզենայի՝ կլինեի, ոչ մի խնդիր ու արգելք չկար։ Ամեն ինչ իր ժամանակն ունի։ Երևի հիմա այլ աշխատանքով պետք է զբաղվեմ, իմ վետերանների խնդիրներով։ Ես ամեն օր այդ գործերով եմ զբաղված, և դա էլ կլինի իմ հիմնական աշխատանքը։
– Իսկ նույն վետերանների խնդիրները օրենսդիր մարմնում բարձրացնելը և լուծում տալն ավելի արդյունավետ չէ՞ր։
– Այդ խնդիրները ուրիշ բարձրացնողներ էլ կլինեն իմ կուսակցությունից։ Կուսակցությունում ես ընկերներ ունեմ, ովքեր միշտ էլ այդ խնդիրները կբարձրացնեն։
– Պարոն Մխիթարյան, իսկ որևէ մեկին աջակցելու, սատարելո՞ւ եք։ ՀՀԿ-ի համար պատրաստվո՞ւմ եք աշխատել։
– Այո, իհարկե, ՀՀԿ-ի օգտին աշխատում եմ, օգնելու եմ իրենց։ Առանձին թեկնածուների էլ եմ օգնելու, բայց չեմ ուզում մանրամասնել։