ԼՂ հակամարտության կարգավորմամբ զբաղվող ԵԱՀԿ Մինսկի խմբի համանախագահների աշխատանքի ներկայիս ձևաչափին այլընտրանք չկա: Ինչպես հաղորդում է RIA Novosti-ն, այս մասին հայտարարել է Ռուսաստանի արտգործնախարար Սերգեյ Լավրովը ՀՀ արտգործնախարար Էդվարդ Նալբանդյանի հետ համատեղ մամուլի ասուլիսին:
«Եթե մենք իսկապես հանձնառու ենք փոխադարձ ընդունելի լուծում որոնելու անհրաժեշտության վերաբերյալ սկզբունքային պայմանավորվածություններին, իմ խորը համոզմամբ, Մինսկի խմբի համանախագահների աշխատանքի ներկայիս ձևաչափին այլընտրանք չկա»,- հայտարարել է Լավրովը:
ՌԴ ԱԳ նախարարը նշել է, որ դրա օգտին բազմիցս հանդես են եկել ինչպես Հայաստանի ու Ադրբեջանի նախագահները, այնպես էլ ԵԱՀԿ բոլոր անդամները:
Նրա խոսքով՝ համանախագահներն անգործության մատնված չեն: «Ես չեմ կարող այդպես որակել այն, ինչ այժմ այդ եռյակի շրջանակներում տեղի է ունենում: Համանախագահներն իրենց եռակողմ փաստաթղթերի հիման վրա, որոնք պարբերաբար տարածվել են որպես ԵԱՀԿ պաշտոնական փաստաթղթեր, արտահայտվել են բանակցային գործընթացի արագացման և ակտիվացման օգտին: Վերջին նման փաստաթուղթն ընդունվել է բառացիորեն օրերս՝ անվտանգության հարցերով Մյունխենի համաժողովի շրջանակներում»,- ասել է Լավրովը: