ԱՄՆ-ի գլխավորած միջազգային կոալիցիայի ռազմաօդային ուժերը ոչնչացրել են սիրիական Ռաքքա նահանգի արևելքում Եփրատի գետի վերջին կամուրջը։ Այս մասին հայտնում է սիրիական SANA գործակալությունը՝ հղում անելով տեղի աղբյուրներին։
Ավիահարվածի արդյունքում ոչնչացվել է Ալ-Մագելյա կամուրջը, որը գտնվում է Մաադան բնակավայրից ոչ հեռու (Ռաքքայից 60 կմ արևելք)։ Այդ կամուրջը վերջինն էր, որ միացնում էր Եփրատի ափերն այդ տարածաշրջանում, և դրա ոչնչացումը լիովին մեկուսացրել է Ալ-Ջազիրա շրջանը։
Գործակալությունը հիշեցնում է, որ վերջին մի քանի ամիսներին կոալիցիայի ինքնաթիռները ռմբակոծել են Եփրատ և Ալ-Խաբուր գետերի կամուրջների մեծ մասը։
ԴԱԻՇ ահաբեկչական կազմակերպության «մայրաքաղաք» Ռաքքան գտնվում է Սիրիայի հյուսիսում (Հալեպից 160 կմ արևելք)՝ Եփրատ գետի ափին։ Քաղաքը գրոհայինների կողմից զավթվել էր 2013 թվականին։