Պանամայի իրավապահ մարմինները օրերս ձերբակալել են օֆշորային ընկերությունների գրանցմամբ զբաղվող Mossack Fonseca իրավաբանական ընկերության երկու համահիմնադիրներին, որոնք կասկածվում են կոռուպցիայի և փողերի լվացմանն առնչություն ունենալու մեջ: Հիշեցնենք՝ Mossack Fonseca-ի այն ընկերությունն է, որից միլիոնավոր փաստաթղթերի արտահոսքը հիմք հանդիսացավ «Պանամական փաստաթղթեր» անունը ստացած միջազգային հետաքննության համար: Այդ ընկերության հետ կապված են բարձրաստիճան պաշտոնյաներ, որոնց թվում էր նաև ԴԱՀԿ ծառայության նախկին ղեկավար Միհրան Պողոսյանը:
Վերջերս ՀՔԾ-ն կարճեց Միհրան Պողոսյանի դեմ հարոցված գործը՝ կապված օֆշորային սկանդալի հետ, և այժմ Միհրան Պողոսյանը ՀՀԿ ռեյտինգային ցուցակով առաջարդված է Ավան և Քանաքեռ-Զեյթուն վարչական տարածքներում:
«Թրանսփերենսի ինթերնեյշնլ» հակակոռուպցիոն կենտրոնը հայտարարություն է տարածել այն մասին, որ անընդունելի է համարում նման սկանդալից հետո Միհրան Պողոսյանի՝ ԱԺ թեկնածու առաջադրվելը:
«Երևույթը բացասական է, նկատի ունեմ և՛ այն սկանդալային պատմությունը, որ մնաց չբացահատված, և՛ չփարատված կասկածներով թեկնածուների ընդգրկվելը որևէ կուսակցության ընտրական ցուցակում: Այդ մարդիկ հավակնում են դառնալ ԱԺ պատգամավոր, դա նշանակում է, որ իշխանությունները ներել են նրանց բոլոր արածները:
Այդպես էլ օբյեկտիվ քննություն տեղի չունեցավ, որպեսզի հասկանայինք՝ եղել էր ինչ-որ մի բան, թե ոչ: Մնացին օդում առկախված կասկածներ: ՀՀ իրավապահ մարմինները չցուցաբերեցին բավականաչափ կամք կամ նրանց չթույլատրեցին իրականացնել օրենքով իրենց վրա դրված բոլոր լիազորությունները՝ բացահայտելու պանամայի օֆշորային սկանդալի հետ կապված դեպքը»,- «Առաջին լրատվական»- ի հետ զրույցում ասաց «Թրանսփերենսի ինթերնեյշնլ» հակակոռուպցիոն կենտրոնի իրավախորհրդատու Հերիքնազ Տիգրանյանը:
Մանրամասները՝ տեսանյութում: