Այսօր ֆեյսբուքյան իր էջում ՍԴՀԿ ատենապետ Նարեկ Գալստյանը հայտարարել էր, որ ՍԴՀԿ-ն առաջիկա խորհրդարանական ընտրություններին չի մասնակցի «Ծառուկյան» դաշինքով, քանի որ խախտվել է նախապես ձեռքբերված պայմանավորվածությունը:
«Առաջին լրատվական»- ի հետ զրույցում, անդրադառնալով հարցին, թե ինչ խախտված պայմանավորվածության մասին է խոսքը, ՍԴՀԿ ատենապետ Նարեկ Գալստյանը նշեց. «Մենք բանակցել ենք բազմաթիվ քաղաքական ուժերի հետ, բոլոր առաջարկները եղել են քաղաքական դաշտի մեր գործընկերների կողմից, այդ թվում նաև այս պարագայում դաշինքին միանալու առաջարկը եղել է Ծառուկյանի վստահված անձանց կողմից: Առաջարկվել է քաղաքական համաձայնության հետևյալ փաթեթը՝ ՍԴՀԿ-ն ոչ թե մտնում է համամասնական ցանկի մեջ, իբրև անդամ, անհատ, այլ դաշինք է կնքում դաշինքի անդամ քաղաքական կազմակերպությունների հետ, և պայմանավորվածությունների հիման վրա մեր 8 ռեյտինգային թեկնածուները, այդ թվում նաև ես՝ Գեղարքունիքում, մեր միջոցներով պետք է մասնակցեինք ընտրություններին՝ քարոզչական աջակցություն ցուցաբերելով դաշինքին… Բանակցություններն ընթացել են բոլոր հնարավոր մակարդակներում, ես՝ ինքս, հանդիպել եմ Գ. Ծառուկյանին: Վերջին 4-5 օրվա ընթացքում սկսվեց անորոշության և քաղաքական համաձայնությունների խախտման փուլ, որտեղ ՍԴՀԿ-ն չի կարող դերակատարություն ունենալ»:
Նարեկ Գալստյանը նշեց, որ դաշինք մտան մարդիկ, որոնց հետ իրենք չէին կարող համագործակցել. «Մարդիկ, որոնք մերժվեցին ՀՀԿ-ի կողմից, կամաց-կամաց սկսեցին մտնել այս դաշինքի մեջ (այդ մասին մենք մամուլից էինք տեղեկանում), և կամաց-կամաց այն վերածվում էր ժուլիկների և գողերի կուսակցության: Եվ բնականաբար ՍԴՀԿ-ն այստեղ չէր կարող դերակատարություն ունենալ»:
Նարեկ Գալստյանը նաև հավելեց, որ իր կարծիքով՝ այս դաշինքում կան նաև այլ դերակատարներ. «Շշուկներ կային, որ այնտեղ կայացված որոշումների հետևում կանգնած է, վերջին շրջանում քաղաքական բառապաշարով ասած, հայտնի չորացող վտակների համադրություն:
Մանրամասները՝ տեսանյութում: