Աֆղանական Հելմանդ նահանգում առնվազն 18 խաղաղ բնակիչ է զոհվել միջազգային ուժերի կողմից հասցված ավիահարվածի հետևանքով։ Այս մասին հայտնում է Աֆղանստանի աջակցության ՄԱԿ-ի առաքելությունը՝ փոխանցում է TASS գործակալությունը։
«Փետրվարի 9-ին և 10-ին միջազգային ուժերն ավիահարվածներ են հասցրել Հելմանդ նահանգի Սանգին շրջանում, որոնց նպատակը, ինչպես հաղորդվում է, եղել են հակակառավարական տարրերը։ Ինչպես ցույց է տվել առաքելության նախնական հետաքննությունը՝ ավիահարվածների հետևանքով սպանվել են առնվազն 18 խաղաղ բնակիչներ, գրեթե բոլորը՝ կանայք և երեխաներ»,-ասվում է առաքելության կայքում հրապարակված հաղորդագությունում։
ՄԱԿ-ում անհանգստություն են հայտնել վերջին օրերին նահանգում բռնության սրման առնչութամբ։ ՄԱԿ-ի տվյալներով՝ նահանգի վարչական կենտրոնում փետրվարի 11-ին տեղի ունեցած ահաբեկչության հետևանքով զոհվել է առնվազն 7 խաղաղ բնակիչ, կան բազմաթիվ վիրավորներ։