ԱՄՆ Կոնգրեսի Սենատը երկուշաբթի երեկոյան կայացած նիստում հաստատել է Կանզաս նահանգից կոնգրեսական Մայք Պոմպեոյին Կենտրոնական հետախուզական վարչության նոր տնօրենի պաշտոնում։ Նրա թեկնածությունն ավելի վաղ առաջարկվել էր նախագահ Դոնալդ Թրամփի կողմից։ Այս մասին հայտնում է New York Times-ը։
Գերատեսչության ապագա նոր ղեկավարին աջակցել են ոչ միայն հանրապետականները, այլև դեմոկրատները։ Նրա հաստատման օգտին քվեարկել են 66 սենատորներ, 32-ը դեմ են արտահայտվել։
«Կոնգրեսական Պոմպեոն պարտավորվել է հետևել կտտանքների արգելքի մասին օրենքին, խոստացել ներկայացնել միջուկային համաձայնագրի՝ Իրանի կողմից կատարման օբյեկտիվ վերլուծություն և հաստատել, որ հետախուզության հարցերով Սենատի հատւուկ կոմիտեն լիովին իրազեկված կլինի ԿՀՎ գործունեության մասին»,-ասել է կոմիտեի անդամ, դեմոկրատ Դայեն Ֆայնստայնը։
Նշվում է, որ 1986-91 թթ Պոմպեոն ծառայել է ցամաքային զորքերում, պաշտոնաթող եղել կապիտանի կոչումով։
Հետախուզության հարցերով կոմիտեում լսումների ժամանակ, որոնք նվիրված են եղել նրա թեկնածության հաստատմանը, կոնգրեսականը հայտարարել է, որ Ռուսաստանն ագրեսիվ կերպով վերականգնում է իր դիրքերն աշխարհում։ Նա մեղադրել է Ռուսաստանին Ուկրաինա ներխուժելու և այն օկուպացնելու, Եվրոպային սպառնալու և ԴԱԻՇ-ի ոչնչացմանը նպաստելու համար ոչինչ չանելու համար։ Բացի այդ, Պոմպեոյի կարծիքով՝ Չինաստանն իրական լարվածություն է ստեղծում աշխարհում։
ԿՀՎ ղեկավարի պաշտոնում Պոմպեոն կհաջորդի Ջոն Բրեննանին։