«Ժամանակ» թերթը գրում է. «ՀՀԿ-ական պատգամավոր Մհեր Սեդրակյանը (Թոխմախի Մհեր) այս տարի չի առաջադրվի ԱԺ ընտրություններին՝ իր փոխարեն նա որոշել է խորհրդարան «գործուղել» «լոնդոններում» ուսանած որդուն՝ Դավիթ Սեդրակյանին։ Սեդրակյանի այսպիսի շրջադարձային որոշումը ՀՀԿ-ում շատերին հայտնի չէր, ուստի մեր հարցումներին որոշակի պատասխան չէին կարողանում տալ նույնիսկ Գործադիր մարմնի անդամ հանրապետականները։ Հայտնի է, որ կուսակցությունում դեռ ամիսներ առաջ Մհեր Սեդրակյանին հասկացրել են, որ ոչ ինքը, ոչ որդին նոր ԱԺ-ում տեղ ունենալու հույս թող չփայփայեն։
Վերջինս էլ սկսել է ինտենսիվ բանակցել Գագիկ Ծառուկյանի հետ, որպեսզի որդին Ծառուկյանի դաշինքի ռեյտինգային ընտրակարգով մասնակցի ընտրություններում։ Հայտնի է, որ Մհեր Սեդրակյանը միշտ լավ շփումների մեջ է եղել Ծառուկյանի հետ և հիմա այդ հարաբերություններն օգտագործելու լավ առիթ է ի հայտ եկել։