Միացյալ Նահանգների ընտրյալ նախագահ Դոնալդ Թրամփի երդմնակալության արարողությունը տեղի է ունենալու հունվարի 20-ին։ Ինչպես արդեն հայտարարել է Հայաստանի արտաքին գործերի նախարարության խոսնակ Տիգրան Բալայանը՝ ԱՄՆ 45-րդ նախագահի երդմնակալության պաշտոնական արարողությանը Հայաստանից կմասնակցի ԱՄՆ-ում ՀՀ արտակարգ և լիազոր դեսպան Գրիգոր Հովհաննիսյանը։
«Կալիֆոռնիա Կուրիեր» թերթի հրատարակիչ և խմբագիր Հարութ Սասունյանը «Առաջին լրատվական»-ի հետ զրույցում նշեց, որ հայկական լոբբիստական կազմակերպությունները մինչ այսօր հանդիպում չեն ունեցել Թրամփի հետ՝ նրա ծրագրերը Հայաստանի մասով անհայտ են. «Չեմ կարող ասել, որ այդ հանդիպումը չի լինի, փորձում են կապ հաստատել Թրամփի մարդկանց հետ, բայց առայժմ ապարդյուն»։
Ավելի վաղ Հարութ Սասունյանը մեզ հետ զրույցում նշել էր, որ քարոզարշավի ընթացքում հայկական կազմակերպությունները, հայ համայնքի ներկայացուցիչները փորձել էին հանդիպում ունենալ, իմանալ, թե Թրամփն ինչ է մտածում հայկական հարցի վերաբերյալ, ինչ դիրքորոշում ունի, սակայն հանդիպում ունենալու բոլոր փորձերն ապարդյուն էին անցել։
«Թրամփի երդմնակալությունից հետո էլ ակնկալիքները մեծ չեն»,- մեզ հետ զրույցում ասաց Հարութ Սասունյանը՝ ընդգծելով, որ միակ հույսն այն է, որ Թրամփի նախագահության օրոք խաղաղություն կլինի Հայաստանում և Լեռնային Ղարաբաղում։
«Հուսանք, որ խաղաղ կլինի իրավիճակը, նոր զոհեր չեն լինի, սահմանին հանգիստ կլինի իրավիճակը»,- ընդգծեց մեր զրուցակիցը։
Դիտարկմանը՝ կա՞ ակնկալիք, որ Դոնալդ Թրամփը գոնե կունենա այն նույն դիրքորոշումը, այն նույն մոտեցումը Ղարաբաղի հարցով, որը պաշտոնական Վաշինգտոնն ուներ Բարաք Օբամայի նախագահության օրոք, Հարութ Սասունյանն արձագանքեց. «Մենք չենք կարող այժմ կանխատեսում ունենալ։ Ոչ ոք չգիտի, թե Թրամփն ինչ է մտածում Ղարաբաղի մասով, նույնիսկ Թրամփն ինքը չգիտի, թե որն է իր դիրքորոշումը»։
