«Հոկտեմբեր ամսվա տնտեսական անկումն աննախադեպ էր: Այս տարվա տնտեսական աճը կլինի մեկ տոկոսի շրջանակներում, 2010թ-ից այս կողմ նման ցածր ցուցանիշ չի արձանագրվել, ինչը վկայում է այն մասին, որ նույնիսկ այն բարեփոխումները, որ կառավարությունը փորձում է իրականացնել, դեռևս չեն տալիս այն արդյունքը, որ հնարավոր լինի տնտեսությունում առկա խնդիրները կարգավորել: Վերջին տնտեսական ցուցանիշները վկայում են տնտեսական անկման մասին»,- այս մասին «Առաջին լրատվական»- ի հետ զրույցում ասաց տնտեսագետ Մեսրոպ Առաքելյանը:
Տնտեսագետի գնահատմամբ՝ այս կառավարության աշխատաոճը ակնհայտորեն տաբերվում է նախորդից. «Սակայն կարևորը բովանդակությունն է, ոչ թե ձևը: Տնտեսության համար կարևորագույն փաստաթղթերից մեկը Հարկային օրենսգրքն է, մենք տեսանք, որ նախորդ կառավարության ժամանակ մշակված օրենսգիրքը սահուն կերպով ընդունվեց այս կառավարության օրոք»:
Մ. Առաքելյանի դիտարկմամբ՝ պաշտոնյաներին պատժելու գործողությունը իհարկե վստահությունը բարձրացնող գործոն է, սակայն խնդիրը ոչ միայն նախորդ պաշտոնյաներին կամ գործարարներին պատժելն է, այլ նաև դրան զուգահեռ ապագային միտված միջավայր ստեղծելը:
Տնտեսագետի խոսքով՝ 2017թ. բյուջեն իր բովանդակությամբ չի տարբերվում նախորդ տարիների բյուջեներից՝ ցուցանիշների տեսանկյունից, միակ էական տարբերությունը պետական պարտքի սպասարկմանն ուղղված միջոցներն են. «2017-ին պետական պարտքի սպասարկման համար կտրամադրվի նույնքան գումար, որքան կրթության կամ առողջապահության ոլորտին, այսինքն՝ մոտ 100 միլիարդ դրամ:
Բյուջեի գումարն այնքան փոքր է, որ ծրագրերի, բարեփոխումների փաստացի իրականացման ժամանակ, երբ որ պետք են ֆինանսական միջոցներ, կառավարության հնարավորությունները և գործունեությունը դառնում են սահմանափակ»:
Մանրամասները՝ տեսանյութում: