Դեկտեմբերի 17-ին տեղի կունենա Հայ ազգային կոնգրես կուսակցության համագումարը։ Օրակարգում նոր վարչության, նախագահի ընտրության և ծրագրային այլ հարցեր են։ «Առաջին լրատվական»-ին այս մասին ասաց կուսակցության վարչության անդամ, ազատամարտիկ Վարդան Մալխասյանը։
– Պարոն Մալխասյան, հայտնի դարձավ, որ առաջիկա ընտրություններին ԼՀ-ն, ՔՊ-ն և «Հանրապետությունը» դաշինքով են մասնակցելու։ ՀԱԿ-ը դաշինքների շուրջ քննարկումներ այժմ տանո՞ւմ է։
– Այո, գիտեմ, որ քննարկումներ գնում են՝ դեռ սկզբնական փուլում են։ Բայց անձամբ ես կողմնակից եմ, որ առանց դաշինքի՝ առանձին մասնակցենք ընտրություններին։ Բայց իմ կարծիքը քիչ է, մեծամասնությունը պետք է որոշում կայացնի։
– Բայց կարծում եք, թե առանձին մասնակցելով՝ հաջողության կհասնե՞ք։
– Եթե մենք ժողովրդին ճիշտ բացատրենք, ճիշտ տանք բոլոր հարցերի պատասխանները, եթե պարզ ու ճիշտ ասենք՝ ժողովուրդը կհասկանա ու կգա Կոնգրեսի հետևից։ ՀԱԿ-ում շատ բանիմաց, խելացի, հայրենիքին նվիրված մտավորականներ կան։
– Ասացիք, որ դաշինքի շուրջ քննարկումներ են տարվում, ի՞նչ գործոններ հաշվի առնելով կգնաք գործակցության։ Օրինակ՝ արտաքին քաղաքական կողմնորոշումը կարևո՞ր է Ձեզ համար։
– Ոչ, դա մեզ համար նշանակություն չունի․ մենք գերխնդիր ունենք: Քաղաքական դաշտը լցվածէ կեղծ ու շինծու կուսակցություններով։ Մենք մեր առաջ խնդիր ենք դրել Հայաստանը փրկել չարիքի իշխանությունից, այսինքն՝ ազատվենք այս բանդիտական, քրեաօլիգարխիկ ռեժիմից։ Երբ հասկանանք, որ ինչ-որ ուժ ևս լծված է այդ գործին՝ մեծ ուժերով կհամագործակցենք, անկախ նրանից՝ արևմտյան, ռուսական, թե՞ հնդկական քաղաքական կողմնորոշում ունի։
– Կարծում եք՝ դաշտում դեռ այդպիսի ուժեր մնացե՞լ են։
– Կարծում եմ՝ այո, որոշ ուժեր մնացել են դեռ։
– Պարոն Մալխասյան, Ծառուկյանը ևս չի բացառել քաղաքականություն իր վերադարձը։ Կգործակցե՞ք նորից իր հետ։
– Այս պահին չեմ կարող ասել դեռ: Պետք է պարզենք՝ Ծառուկյանն ինչպես է գալու քաղաքականություն. նա հիմա Սերժի հետ բավականին մտերմացել է։ Հիմա որ գալիս է, մաքուր ձևո՞վ է գալիս, թե՞ ուղարկում են։ Քաղաքականությունը շատ անհասկանալի բան է։ Եթե մենք պարզենք, որ մաքուր մղումներով է գալիս, կքննարկենք այդ հարցը։
Լուսանկարը՝ Photolure-ի