Հայաստանում Իրանի արտակարգ և լիազոր դեսպան Սեյեդ Քազեմ Սաջադին հուսով է, որ Իրանի նախագահ Հասան Ռուհանիի այցը Հայաստան տեղի կունենա մոտ ժամանակներս: Դեսպանն այս մասին նշեց «Առաջին լրատվական»-ի հետ զրույցում՝ պատասխանելով հարցին, թե ինչո՞ւ է ձգձգվում Իրանի նախագահի երկար սպասված այցը:
– Պարոն դեսպան, մոտ մեկ ամիս առաջ Դուք հայտարարեցիք, որ շուտով տեղի կունենա Իրանի նախագահ Հասան Ռուհանիի այցը, ինչը ելակետային իրադարձություն է լինելու հայ-իրանական հարաբերություններում: Մի քանի օր առաջ հարցին անդրադարձել է նաև Իրանի արտաքին գործերի նախարարությունը, բայց այցն առայժմ տեղի չի ունեցել: Ե՞րբ կարող ենք սպասել Իրանի նախագահին Երևանում, և ի՞նչն է այցի ձգձգման պատճառը՝ քաղաքակա՞ն, թե՞ զուտ տեխնիկական, արարողակարգային խնդիր է:
– Բարեբախտաբար, եղանակը դեպի լավն է գնում, և ես հուսով եմ, որ նախագահ Հասան Ռուհանին շուտով կլինի Հայաստանում, և երկու երկրներն ավելի կամրացնեն իրենց կապերը:
– Հայ փորձագետներից մեկը կարծիք հայտնեց, որ այցի ուշացումը կարող է կապված լինել տարածաշրջանային խնդիրների, օրինակ՝ Իրանի և Թուրքիայի լարված հարաբերությունների հետ: Դա հնարավո՞ր է:
– Փորձագետներն ունեն իրենց մասնագիտական կարծիքը: Մենք Հայաստանի հետ ունենք լավ, բարեկամական կապեր, և սահմանված ժամկետում այցը Հայաստան լինելու է:
– Պարոն դեսպան, իսկ ի՞նչ խթան կլինի պարոն Ռուհանիի այցը հայ-իրանական հարաբերությունների զարգացման համար:
– Նախորդ տարի բազմաթիվ հանդիպումներ են եղել երկու երկրների տարբեր գերատեսչական մարմինների միջև, և ես հուսով եմ, որ նախագահի այցից հետո այդ համագործակցությունը ավելի կամրապնդվի ու կխորանա:
Իրանի Իսլամական Հանրապետությունը փոխադարձ հարգանք ունի իր բոլոր հարևան երկրների նկատմամբ և իր հարաբերությունները կառուցում է դրա հիման վրա, այդ երկրների թվում է նաև Հայաստանը, որի հանդեպ Իրանը մեծ հարգանք ունի և ավելացնելու է իր բարեկամական կապերն ու հարաբերությունները այս երկրի հետ:
– Ադրբեջանի նախագահ Իլհամ Ալիևը սպառնացել էր, որ եթե Ռուհանին գա Հայաստան, ինքը կգնա Իսրայել: Այս սպառնալիքը կարո՞ղ էր ազդել Իրանի որոշման վրա:
– Ես այդպիսի լուր չեմ լսել, տեղյակ չեմ նման հայտարարության մասին: