Sputnik լրատվական գործակալության փոխանցմամբ՝ վրացական կողմն ավարտել է այն փաստաթղթերի վրա աշխատանքները, որոնք նախատեսված են ռուս-վրացական սահմանին ապրանքաշրջանառության մոնիթորինգի մասին համաձայնագրով։
Այդ մասին հայտարարել է Վրաստանի վարչապետի՝ Ռուսաստանի հետ հարաբերությունների կարգավորման հարցերով հատուկ ներկայացուցիչ Զուրաբ Աբաշիձեն, ով նախօրեին Պրահայում հանդիպել է Ռուսաստանի փոխարտգործնախարար Գրիգորի Կարասինի հետ։
Հանդիպման ժամանակ կողմերը, ի թիվս այլ հարցերի, քննարկել են նաև ապրանքաշրջանառության ու մաքսային վարչարարության մոնիթորինգի մեխանիզմի հիմնական սկզբունքների մասին երկկողմ համաձայնագիրը, որը Ժնևում ստորագրվել է 2011 թվականի նոյեմբերի 9-ին։
Աբաշիձեն հայտարարել է, որ ներկայումս վրացական կողմը սպասում է ռուսական կողմի կոնկրետ տեղեկատվությանը։
Ռուս-վրացական սահմանին ապրանքաշրջանառության մոնիթորինգի մասին համաձայնագրի պայմանների վերաբերյալ բանակցություններ են անցկացվել Վրաստանի կառավարության ու շվեյցարական SGS ընկերության միջև։
SGS-ը պետք է վերահսկի ռուս-վրացական սահմանին, այդ թվում նաև պաշտոնական Թբիլիսիի չվերահսկած հատվածներում (Աբխազիայի ու Հարավային Օսիայի հետ վարչական սահմաններ) բեռնափոխադրումները։