ՀՅԴ-ի գնահատմամբ՝ համարձակ ու հավակնոտ է Կարեն Կարապետյանի կառավարության ծրագիրը: ՀՅԴ խմբակցության ղեկավար Արմեն Ռուստամյանը և խմբակցության քարտուղար Աղվան Վարդանյանն այսօր խորհրդարանում մինչ կառավարության ծրագրի քննարկումը ներկայացրին իրենց խմբակցության տեսակետը կառավարության ծրագրի մասին:
ՀՅԴ խմբակցության քարտուղար Աղվան Վարդանյանի խոսքով՝ իրենք մոտ տասն օր է՝ աշխատում են ծրագրի վրա, քննարկումներ են լինում, Կառավարությունն անընդհատ վերամշակում էր նախնական տարբերակը, իրենք էլ զուգահեռաբար իրենց մոտեցումներն էին ներկայացնում. «Երկուշաբթի օրը հանդիպել ենք վարչապետի հետ և մանրամասն խոսել ծրագրի մասին: Մեր գնահատմամբ՝ այս ծրագրի կարևորագույն ուղերձը մեր երկրի այսօրվա իրավիճակի համարձակ ու շիտակ ախտորոշումն է՝ առանց ինքնախաբեության, առանց թաքցնելու՝ ինչ վիճակ ունենք երկրում՝ տարբեր առումներով: Բնականաբար, երբ ճիշտ ախտորոշում ես կատարում, դրանից էլ բխում են հնարավորինս ճշգրիտ ձևակերպվելիք խնդիրները: Համարձակ ու հավակնոտ ծրագիր է և իրավիճակին լրիվ համարժեք»:
Ա. Վարդանյանը նաև հավելեց, որ քննարկումների ժամանակ արձանագրել են, որ ծրագրում առնվազն 90 տոկոսով ներառված են այն հարցերը, որոնց մասին Դաշնակցությունը տարիներ շարունակ խոսում էր, և որոնք տեղ են գտել ՀՅԴ-ՀՀԿ համագործակցության համաձայնագրում:
«Մենք ծրագրի դրույթներում տեսնում ենք կամք, վճռականություն, էներգիա, երկրում արդյունավետ կառավարում ապահովելու, իրական որակական փոփոխություն իրականացնելու վճռականություն: Այս ծրագիրը՝ իր խնդիրներով, նպատակադրումներով, ունենալու է Դաշնակցության ամբողջական աջակցությունը, և արդեն ընթացքում, ըստ կատարողականի, արդյունքների, կգա նաև գնահատելու ժամանակը»,- ասաց Վարդանյանը և հավելեց, որ ՀՅԴ-ն ուզում է հավատալ, որ երկրում իսկապես բան է փոխվում. «Նոր արյուն է մտնում երկիր, պետություն-հասարակություն-քաղաքացի հարաբերություններում նոր հիմք է դրվում, մեր անկախության սերունդն իսկապես գործ ունի անելու…»։
Մանրամասները՝ տեսանյութում: