ԱՄՆ վարչակազմը դիտարկում է Սիրիայի նկատմամբ գործողությունների նոր հնարավոր տարբերակներ՝ կապված հրադադարի խախտման հետ: Այս մասին ԱՄՆ պետքարտուղար Ջոն Քերին սեպտեմբերի 22-ին հայտարարել է Նյու Յորքում ՄԱԿ-ի Գլխավոր ասամբլեայի 71-րդ նիստի շրջանակներում Սիրիայի քաղաքացիական հասարակության ներկայացուցիչների հետ հանդիպմանը: Այդ հանդիպման ձայնագրության հատվածներ հրապարակել է The New York Times-ը:
Քերին կարծիք է հայտնել, որ «Ասադի անտարբերությունը ամեն ինչի նկատմամբ» կարող է ԱՄՆ կառավարությանը մղել Սիրիայի ուղղությամբ մշակել այլ կուրս՝ գրում է պարբերականը: Նրա վկայությամբ՝ Քերին նշել է, որ այժմ Վաշինգտոնում Սիրիայի հակամարտության վերաբերյալ ԱՄՆ գործողությունների մասին «այլ խոսակցություն է գնում»՝ Ժնևում սեպտեմբերի 10-ին մշակված ռուս-ամերիկյան խաղաղարար նախաձեռնությունների փաստացի ձախողումից և Հալեպում հարձակողական գործողություններից հետո:
Ընդ որում, նա հաստատել է, որ ԱՄՆ-ը մեծ ցանկություն չունի ընդլայնել ռազմական օգնությունը Սիրիայի զինված ընդդիմությանը և ավելին՝ ուղղակիորեն ընդգրկվել ռազմական գործողություններում՝ մտավախություն ունենալով բացասական հետևանքներից:
Նրա կանխատեսումներով՝ Սիրիայի իրավիճակին ԱՄՆ մասշտաբային միջամտության ընդլայնման դեպքում նման կերպ կվարվեն և մնացած շահագրգիռ կողմերը: «Ռուսաստանը ավելի շատ կներդնի, Իրանը ավելի շատ կներդնի, «Հըզբոլահը», «Ջեբհաթ ան-Նուսրան», Սաուդյան Արաբիան և Թուրքիան բոլոր գումարները կտրամադրեն իրենց վստահված անձանց և ձեզ բոլորիդ կոչնչացնեն», – ասել է Քերին՝ դիմելով հանդիպման սիրիացի մասնակիցներին:
