Օրերս Վարդենիս գյուղի Զալիբեկ Հակոբյանի անվան միջնակարգ դպրոցի աշակերտները դասադուլ էին արել: Մամուլն անդրադարձել խնդրին, նշվել էր, որ «91 աշակերտները հրաժարվում են դասերից, քանի որ դպրոցը գտնվում է անմխիթար, կարելի է ասել՝ «քարե դար» վիճակում»։ Այսօր «Առաջին լրատվական»- ի նկարահանող խումբը վերոնշյալ դպրոցում էր, որտեղ դասերը վերսկսվել էին:
Վարդենիսի Զալիբեկ Հակոբյանի անվան միջնակարգ դպրոցի տնօրեն Ավետիք Ավետիսյանը մեզ հետ զրույցում պարզաբանեց, թե ինչու էին աշակերտները որոշել դասադուլ անել և ինչպես է հաջողվել նրանց համոզել՝ դադարեցնել դասադուլը. «Իրոք մեր դպրոցի պայմանները շատ վատ պայմաններ են, 20 տարի է՝ դպրոցը վթարային վիճակում է: Բայց մեր իշխանությունները, Ս. Սարգսյանը ձեռնամուխ եղան, որ նոր դպրոց կառուցվի: Ես և գյուղապետը դիմել էինք պատկան մարմիններին, եկան, տեսան, որ անհնար էր վերանորոգել: Մեր պատգամավորի միջոցով դիմեցինք նախագահին, փառք Աստծո, արդեն 1 մլն դոլարից ավել գումարով կառուցվում է նոր դպրոց, որը շուտով կլինի հանրապետության լավագույն դպրոցներից: Ըստ շինարարների՝ դպրոցը մասնակի պատրաստ կլինի մինչև հոկտեմբերի 10-ը: Մենք երեխաներին խոստացել ենք, որ հոկտեմբերի 10-ին նոր դպրոցում ենք դաս անելու:
Ունենք շատ լավ մանկավարժական կոլեկտիվ և շատ լավ աշակերտներ, պարզապես կան «աբիժնիկներ», որոնք բացել էին այն սենյակների դռները, որ 10-15 տարի չեն օգտագործվել և սենսացիոն տեսանյութ են նկարահանել: Դա պատիվ չի բերում այդ մարդկանց, ովքեր դա երեխաներին սովորեցրել են: Երեխաներն էլ, մենք էլ նոր դպրոց ենք պահանջում, մենք էլ ենք ուզում լավ պայամաններում աշխատել, ուղղակի չգիտեմ, թե ով էր փոթորիկ ստեղծել մի բաժակ ջրում: Ինչի՞ մասին է խոսքը, եթե նոր դպրոցը կառուցվում է:
Էսօր կան մարդիկ, որ նախընտրական կամպանիայի հետ կապված՝ ուզում են մարդկանց վրա ցեխ շպրտել, վարկաբեկել: Այս նեղ պայմաններում պետությունը 1 մլն դոլար է հատկացրել այս փոքրիկ գյուղում դպրոց կառուցեու համար, արժե՞, որ մենք այդ ձեռքբերումները ոտնատակ տանք»:
Աշակերտները մեզ հետ զրույցում նշեցին, որ ոչ ոք իրենց չի սովորեցրել դասադուլ անել. «Մենք ուզում ենք նոր դպրոց ունենալ: Շինարարությունը նորմալ տեմպով չի ընթանում: Մեր տնօրենը խոստացավ, որ 10 օրում հարցը կլուծվի»:
Մանրամասները՝ տեսանյութում:
