Minval.az-ի փոխանցմամբ՝ Պակիստանը պատրաստ է կարճ ժամանակում Ադրբեջանի ռազմաօդային ուժերը համալրել JF-17 Thunder կործանիչներով: Այս մասին Azeri Defence ռազմական պարբերականին տված հարցազրույցում հայտարարել է պակիստանյան աերոնավիգացիոն համալիրի (Pakistan Aeronautical Complex Kamra) մարշալ Արշադ Մալիքը:
«Մենք սերտորեն համագործակցում ենք Ադրբեջանի ռազմաօդային ուժերի հետ: Մենք կարող ենք կարճ ժամանակում Ադրբեջանի ռազմաօդային ուժերին ապահովել մարտական ու ուսումնական ինքնաթիռներով:
Որևէ խնդիր չկա Պակիստանում արտադրվող JF-17 Thunder կոծանիչներն Ադրբեջան հասցնելու համար»,- ասել է նա՝ ընդգծելով, որ JF-17-ի դեպքում հնարավոր է ինչպես ռուսական արտադրության, այնպես էլ ՆԱՏՕ-ի երկրների արտադրության և այլ տիպի զինամթերքի կիրառում:
Նա նաև հայտարարել է, թե Իսլամաբադը պատրաստ է Բաքվի հետ կիսվել իր վերջին տեխնոլոգիաներով:
Հիշեցնենք, որ Հայաստանի Հանրապետության և Պակիստանի Իսլամական Հանրապետության միջև դիվանագիտական հարաբերություններ հաստատված չեն:
