ՀՀ ոստիկանությունից տեղեկացնում են, որ որպես անհետ կորած որոնվող Արագածոտնի մարզի Եղիպատրուշ գյուղի 20-ամյա բնակչուհի Հրանուշ Եղիազարյանը հայտնաբերվել է: «Ձեռնարկված որոնողական աշխատանքների արդյունքում՝ սեպտեմբերի 29-ին, ժամը 9-ի սահմաններում, Հրանուշ Եղիազարյանը հայտնաբերվել է Երևանում և տեղափոխվել ոստիկանության Ապարանի բաժին: Կատարվում է հետաքննություն»,- նշվում է տարածված հաղորդագրությունում:
Եղիպատրուշի գյուղապետ Մարզպետ Գրիգորյանը Armtimes.com-ի հետ զրույցում հայտնել է, որ գիտի միայն, որ Հրանուշի հայտնաբերել են Երևանում և այս պահին ոստիկանության Ապարանի բաժնում հարցաքննում են: Այլ մանրամասներ գյուղապետին դեռ հայտնի չէին:
Հիշեցնենք, որ երեկ տնից անհետացել էր Արագածոտնի մարզի Եղիպատրուշ գյուղի 20-ամյա բնակչուհի Հրանուշ Եղիազարյանը: Նախ տեղեկություններ էին շրջանառվում, որ արջն է նրան տարել: Ապա հայտնի դարձավ, որ 1 տարեկան երեխայի մայրը գրություն էր թողել՝ նշելով, որ գնում է անտառ, ուզում է ինքնասպան լինել:
