Այսօր մենք տեղեկացրել էինք, որ Արժույթի միջազգային հիմնադրամի նախագահի պաշտոնից հրաժարական է տվել Դոմինիկ Ստրոս Կանը, որը մայիսի 14-ին ձերբակալվել էր Նյու Յորքի օդանավակայանում, և որին առաջադրվել է սեռական բնույթի ոտնձգություն իրականացնելու մեղադրանք:
Այսօր The Daily Telegraph-ը ներկայացրել է նրան փոխարինող երկու հիմնական թեկնածուների անունները: Ըստ թերթի՝ դրանք կարող են լինել Ֆրանսիայի ֆինանսների նախարար Քրիստին Լագարդը և Գերմանիայի Կենտրոնական բանկի նախկին նախագահ Աքսել Վեբերը: The Daily Telegraph-ի տեղեկություններով, այդ պաշտոնը կցանկանար զբաղեցնել նաև Մեծ Բրիտանիայի նախկին վարչապետ Գորդոն Բրաունը, սակայն գործող վարչապետ Դեյվիդ Քեմերոնն արդեն հասկացրել է, որ դեմ է այդ տարբերակին:
Քրիստին Լագարդի թեկնածությունն արդեն պաշտպանել են մի շարք քաղաքական գործիչներ, այդ թվում՝ Շվեդիայի ֆինանսների նախարար Անդերս Բորգը: Եթե նրա թեկնածությունը հաստատեն, ապա ԱՄՀ-ն կունենա առաջին կին ղեկավարը: Սակայն նրա թեկնածությանը կարող են դեմ լինել ֆրանսիացի լինելու պատճառով, քանի որ այդ երկրի ներկայացուցիչներն ամենաշատն են զբաղեցրել ԱՄՀ ղեկավարի պաշտոնը:
Ինչ վերաբերում է գերմանացուն, ապա նա Եվրոպական Կենտրոնական բանկի ղեկավարի ամենահավանական թեկնածուն էր, սակայն 2011 թ. սկզբին հրաժարական տվեց Գերմանիայի Կենտրոնական բանկի ղեկավարի պաշտոնից: Սպասվում է, որ Աքսել Վեբերին կաջակցի Անգելա Մերկելը:
