«Խնդիրը ոչ այնքան վարչապետի հրաժարականն է, որքան Հայաստանում նոր կառավարության ձևավորումը»,- կառավարության, ՀՀ 13-րդ վարչապետ Հովիկ Աբրահամյանի հրաժարականի վերաբերյալ «Առաջին լրատվական»- ի հետ զրույցում ասաց քաղաքական և ընտրական տեխնոլոգիաների փորձագետ Արմեն Բադալյանը: Նրա դիտարկմամբ՝ Հայաստանում հասարակությունը չունի այն ուժը, որ կարողանա իշխանություն ձևավորել, և այդ ուժի բացակայությունը փոխհատուցվում է աշխարհաքաղաքական կենտրոնների գործունեությամբ. «Եթե դու չես ձևավորում քո իշխանությունը, այն ձևավորում են դրսից»:
Ա. Բադալյանի խոսքով՝ քանի որ Հայաստանը փոխել է Սահմանադրությունը և անցնում է խորհրդարանական համակարգի, և մյուս տարի էլ խորհրդարանական ընտրություններն են տեղի ունենալու, բնականաբար, երկու կենտրոնների՝ Արևմուտքի և Ռուսաստանի ուշադրությունը մեծացել է այս իշխանության ձևավորման գործընթացի վրա:
«Արևմուտքն աշխատում է փափուկ ուժի քաղաքականությամբ, դրա դրսևորումներից էր Հռոմի պապի այցը Հայաստան, որի մեսիջն էր՝ Հայաստանում պետք է օլիգարխիկ համակարգը մի կողմ քաշվի, և նոր դեմքերով պետք է Հայաստանի իշխանությունը դրսևորվի: Փափուկ ուժի կիրառման երկրորդ դրսևորումը Հայաստանում ԵՄ դեսպանության գործունեությունն է՝ կապված նոր ԸՕ ընդունելու գործընթացի հետ, բավականին գումար հավաքեց և այլն:
Կա փափուկ ուժ արևմուտքից, կա մեծ ատելություն իշխանության նկատմամբ, որը դրսևորվեց նաև «Սասնա ծռեր»- ի գործողությամբ, և այս երկուսի հանրագումարի արդյունքում հնարավոր էր, որ հաջորդ խորհրդարանը լիներ ոչ ռուսամետ, դա չի նշանակում հակառուսական, իսկ 2022-ին հնարավոր էր հաջորդ քայլն անել և ամբողջովին արևմտամետ խորհրդարան ունենալ: Դա կհանգեցներ Հարավային Կովկասում Արևմուտքի դերի ուժեղացման:
Բնականաբար դա Ռուսաստանին ձեռնտու չէր կարող լինել: Եվ Հայաստանում նշանակելով իր կողմից վարչապետ՝ Ռուսաստանը կանխեց Արևմուտքի ծրագիրը իր ծրագրով:
Ռուսաստանում Կ. Կարապետյանը իր բիզնեսն ունի, ղեկավարության հետ լավ հարաբերություններ ունի և այդ լավ պայմանները փոխարինում է ՀՀ վարչապետի պաշտոնով: Կարող է լինեն մարդիկ, ովքեր կասեն՝ նա քաղաքական «Հունան Ավետիսյան» է, սակայն դա իրականությանը չի համապատասխանում: Եթե եկել է, ուրեմն ազդեցիկ ուժ է նրան կարգադրել, և այդ ազդեցիկ ուժը հաստատ ՀՀ նախագահը չէ»,- մեկնաբանեց քաղաքական և ընտրական տեխնոլոգիաների փորձագետը՝ հավելելով՝ չգիտենք, թե նա Պուտինից ինչ անելու մանդատ է ստացել և ինչքան ժամկետում է դա իրականացնելու:
Մանրամասները՝ տեսանյութում:
